Noyabr 1 künü Bağçasarayda Meclis azaları öz vazifelerini başlamasınıñ tantanalı merasimi keçirilecek

30 Oktâbr 2013

Noyabr 1 – cuma künü Meclisniñ yañı saylanğan reisi ve azalarınıñ öz vazifelerini eda etip başlamasınıñ tantanalı merasimi ötkerilecek.

Merasim saat 11.30-da cuma namazınen başlanacaq.

Tantanalı tedbirde Milliy Meclisniñ sabıq reisi Mustafa Cemilev, Meclis reisi Refat Çubarov, VI çağırılış Qurultayınıñ birinci sessiyasında saylanğan Meclis azaları iştirak etecekler.

Tedbirge Qurultay Teftiş komissiyasınıñ azaları, regional ve yerli meclis azaları, qırımtatar halqı milliy areketiniñ veteranları, milliy idare organlarınıñ qoltutuvında saylanğan çeşit seviyedeki şuralarnıñ deputatları, qırımtatar cemaat teşkilâtlarınıñ vekilleri davet etileler.

Hatırlatamız ki, 2013 senesi oktâbr 26-27 künleri Aqmescitte Qırımtatar halqı VI çağırılış Qurultayınıñ birinci sessiyası ötkerilip, onda Meclisniñ yañı reisi olaraq Refat Çubarov ve qırımtatar halqı vekâletli organınıñ yañı erkânı saylandı.