Avropa parlamentiniñ deputatı Vitautas Landsbergis Qırım barışıq ve tınçlıq kefili olacağına ve bu Ukraina ve Avropa içün müim olğanına emin

24 Oktâbr 2013

Litvaniya cumhuriyetine iş ziyaretiniñ birinci künü – oktâbr 21-de Meclis reisi Mustafa Cemilev Litvaniya Seyminiñ sabıq reisi, Avropa Parlamentiniñ deputatı Vitautas Landsbergis ile körüşti.

Körüşüvde Meclis tışqı alâqalar bölüginiñ başı Ali Hamzin, Litvaniya tatarları cemiyetiniñ başı, Meclisniñ Litvaniyadaki temsilcisi Adas Yakubauskas ve Ukraina halq deputatı Mustafa Cemilevniñ iqtisadiy meseleler boyunca yardımcısı Rustem Ümerov iştirak ettiler.

Körüşüv vaqtında Qırım ve Ukrainada Avropa Birligi ile birleşme imzalanması arfesindeki vaziyet, imzalanacaq Añlaşmanıñ bir qısmı olacaq Avropa Birliginen serbest ticaret alanı meselesi muzakere etildi.

Vitautas Landsbergis qırımtatarlarnıñ Ukrainada alı, bilhassa Qurban bayramı künleri camiler yaqılmasınıñ tafsilâtlıca tarif etilmesini rica etti. Avropa Parlamenti deputatınıñ fikrince bu vahşiylikni yarımadada vaziyetni kerginleşçtirmek maqsadınen yapılğan fesat, dep tanılmalı. Onıñ aytqanına köre, fesatlar türkümi Ukrainanıñ Avropa cemiyetine qatılmasına qarşı olaraq, Vilnüste Avropa Birliginen Añlaşma imzalanmasına da keder etmege doğrultılğandır.

Mustafa Cemilev Vitautas Landsbergisniñ kederli fikirlerine qoşularaq Ukrainada Meclis ta 2010 senesi teklif etken Halqara forumnıñ keçirilmesi zarurlığına diqqatnı celp etti.

Bu munasebetnen Meclis reisi 2013 senesi sentâbr 19-da Qırım Nazirler Şurasında Avropa Aliy komissarı Ştefan Füleniñ qırımtatarlar ile körüşüvinde Meclis reisi yolbaşçılığında Meclis azaları da iştirak etkenleri aqqında tafsilâtlı malümat berdi. Bunıñ kibi de sentâbr 26-da Brüsselde “Qırımtatarlarnıñ aqlarınen bağlı vaziyet boyunca” keçirilgen acele diñlev aqqında da bilgi berildi. Körüşüvniñ soñunda Vitautas Landsbergis Qırımnı arbiy qarışuvdan serbest etmek meselesini kötermekni ve bu mevzuğa bağışlanğan ayrıca halqara konferentsiya keçirmekni teklif etti.

“Geosiyasiy menfaatlarnıñ rastkeliştigi hususiy region olaraq Qırım arbiy qarışuvlardan serbest alan etip ilân etilmesi onıñ barışıq ve tınçlıq kefili olmasını teminler. Bu ise Ukraina, Avropa ve sabıq sovetlerdeki regional siyaset içün ğayet müimdir”, – dedi belli siyasetçi Vitautas Landsbergis.