Qurban Bayramınıñ ekinci künü Qarasubazarda qurulacaq cami temeline kapsula qoyuldı

16 Oktâbr 2013

Qarasubazarda yañı qurulacaq cami temeline oktâbr 16-da Qurban Bayramı künlerinde kapsula qoyuldı.

Tedbirde Qırımtatar halqı Meclisi reisiniñ birinci muavini Refat Çubarov, Qırım musulmanlarınıñ Müftisi hacı Emirali Ablayev, Meclis reisiniñ muavini Remzi İlyasov, Meclis Prezidiumınıñ azası, “Maarifçi” birleşmesiniñ reisi Safure Kacametova, Bekir Çoban-zade fondınıñ qurucısı Resul Velilâyev, Qarasubazar regional ve yerli meclisler, yerli akimiyet vekilleri, Qarasuvbazar şeeriniñ başı Albert Kangiyev iştirak ettiler.

Tedbir duadan ve qurban çaluvdan başlandı.

Qırım musulmanlarınıñ Müftisi hacı Emirali Ablayev toplanğanlarnı Qurban bayramınen hayırladı. “Bizni bugün Qarasuvbazarda toplağan vaqia tarihımız içün pek müimdir, – dedi Emirali Ablayev. – Qadim zamanlarda mında pek çoq cami ve medrese bar edi, bugün bular kene ğayrıdan tiklenmesi bizlerni pek sevindire”.

Bunıñ kibi de Müftiy cami qurucılığı teşebbüsçilerine, Şu cümleden Bekir Çoban-zade fondınıñ esasçısı Resul Velilâyevge, teşekkür bildirdi. Öz nevbetinde Meclis reisiniñ birinci muavini Refat Çubarov da er kesni bayram ile hayırladı.

“Bugün burada qoydığımız temel – bu sadece caminiñ temeli degil. 20-25 yıl evelsi biz bu yerde qırımtatarlarnen körüşip, Qırımnıñ kelecegi aqqında qaar-qasevetlerimiz, planlarımız aqqında qonuşqanımızda aynı şu yerde cami qurulacağını tasavur bile etmedik.

Bu cami – halqımızğa qoyulğan bir eykel olur.Biz dedelerimiz yapqan işlerni unutmağanımız, olarnı ğayrıdan canlandırğanımıznı köstermek kerekmiz”, – dedi Refat Çubarov. – Meclis adından Resul Velilâyevge ve qardaşı Remzige babaları Refat Velilâyevniñ hatırasına cami qurmaq niyetleri içün minnetdarlıq bildirdi”.

Qırım Nazirler şurası reisiniñ muavini Aziz Abdullayev de er kesni em bayram, em bu quvançlı vaqianen tebrikledi.

Tedbirde Qarasuvbazar rayon devlet memuriyetiniñ reisi Öleg Rusetskiy, Qarasuvbazar başı Albert Kangiyev ve Qırım yeparhiyası vekili Maksim çıqışta bulundılar. Hristianlarnıñ vekili dinlerara barışıq timsali sıfatında Qarasuvbazar imamına İncilni bağışladı.

“Sayğılı dostlar, menim arzum yerine kelgen kün de yetip keldi. Bu künge yetişip olamağan rahmetli babama bergen sözümni yerine ketirmek vaqtı keldi, – dedi Resul Velilâyev. – Men bugün babamnen beraber eski camige namazğa qatnağan qartlarımızğa yalvaram, cami qurulğance sağ-selâmet oluñız ve siz birinci olıp camige kirersiñiz. Men içün bu büyük şeref ve quvanç olur”.

Resul Velilâyev şunı da qayd etti ki, camini bir özü degil de, bütün halq qura. “Maña yardım etken ükümet qurumlarına, Qırım musulmanlarınıñ diniy idaresine ricama seslengenleri ve musaade vesiqalarnıñ resmiyleştirilmesine yardım etkenleri içün minnetdarım. Ve elbetteki bu vaqianıñ olmasında Meclis reisi Mustafa Cemilev ve onıñ birinci muavini Refat Çubarov da bivasta iştirak etkenlerini aytmaq isteyim”.

Cami qurucılığı teşkilâtçılarınıñ planlarına köre yañı caminiñ qapıları eki yıldan soñ açılacaq.