Ali Hamzin Ukraina Tış işleri naziri Leonid Kojaranıñ diqqatını nazirlikniñ Ukrainada qırımtatarlar aqsımlanmağanı aqqında yalan yazılğan vesiqağa diqqatını celp etti

20 Sentâbr 2013

Meclis tışqı alâqalar bölüginiñ başı Ali Hamzin emin ki, ukrain akimiyeti OSCE Aliy komissarınıñ ofisi azırlağan “Evel sürgün etilgen şahıslarnıñ Qırımda, Ukrainada qatıluvı” maruzasına diqqatlıca yanaşmaq kerek. Bu aqta Meclis tışqı alâqalar bölüginiñ başı Avropa Birligi komissarı Ştefan Füle ile sentâbr 19-da olıp keçken körüşüvde ayttı

Ukraina Tış işleri nazirligi tarafından tarqatılğan ingliz tilinde “Evel sürgün etilgen şahıslarnıñ ukrain cemiyetine qatılmasınıñ vaziyeti aqqında” vesiqağa işmar eterek Ali Hamzin Ukraina Tış işleri naziri Leonid Kojaranıñ diqqatını şuña celp etti ki, nazirlikniñ Ukrainada qırımtatarlar aqsımlanmağanı aqqındaki sözleri quru yalandır.

“Bu yalanmı ya da bu aqiqat AQŞ, bir sıra halqara teşkilâtlar, şu cümleden OSCE ve BMTnıñ İnsan aqları boyunca komitetniñ Ukrainada milletlerara munasebetler saasında vaziyetni kergin, dep belgilegen er yıllıq maruzaları da yalanmı?”, – Ali Hamzin OSCE reisi Leonid Kojarağa işte böyle sualnen hıtap etti.

Bunıñ kibi de Meclis Tış alâqalar bölüginiñ başı dedi ki, Ukraina Tış işler nazirligi OSCE Aliy komissarınıñ ofisi azırlağan “Evel sürgün etilgen şahıslarnıñ Qırımda, Ukrainada qatıluv” maruzasını diqqatqa almadı. “OSCE ofisiniñ hadimleri sürgün etilgenlerniñ meseleleri boyunca Norvegiya Tış işleri nazirliginiñ yardımında azırlağan esabatlarını Ukraina Tış işleri nazirligine resmiy sürette defalarca yollamaqtalar. Lâkin Ukraina Tış işler nazirligi OSCE Aliy komissarınıñ ofisi azırlağan “Evel sürgün etilgen şahıslarnıñ Qırımda, Ukrainada qatıluv” maruzasını diqqatsız qaldırdı, Tış işler nazirliginden iç bir türlü cevap olmadı”, – dedi Hamzin.

Öz nevbetinde Ukraina Tış işler naziri Leonid Kojara dedi ki, OSCE Aliy komissarınıñ ofisi azırlağan esabattan haberim bar, onı diqqat ile oqup çıqtım. “Zanımca, halqara teşkilât tarafından yapılğan bu, birinci böyle araştırmadır, – dep qayd etti Kojara. – Böyle tedqiqatlarnıñ kelecekte de olmasını ister edik”. Bunıñnen birlikte Leonid Kojara şunı da qayd etti ki, akimiyet vekili olaraq o, bu maruzadan qullanıp olamaz, çünki onıñ fikrince, maruza Avropa qanunlarına uya, lâkin Ukrainanıñ qanunlarına ve içki taliline iç uymay.