Leonid Kuçma: Akimiyet daima Meclis ile dialogda bulunmaqnı devam etmesi ve bu muntazam sürette olması kerek

17 Sentâbr 2013

Ukrainanıñ sabıq Prezidenti L. Kuçma 1999 senesi mayıs 18-de Ukraina Prezidenti yanında Qırımtatar halqı vekilleriniñ keñeşini meydanğa ketirmek aqqında imzaladığı №518/99 fermannı doğru ve tam zamanında yapılğan iş, dep saya. O vaqıtta keñeşke Meclisniñ bütün azaları kirgen edi.

“Zamanına köre qabul etilgen qarar pek doğru edi. Eger o qarar bugün de keregi kibi çalışsa edi, akimiyet ve qırımtatarlar arasındaki munasebet tek qaviyleşir edi”, – dep qayd etti L. Kuçma. Bunıñnen birge L. Kuçma devletniñ bugünki yolbaşçısı Viktor Yanukoviç nege esaslanıp Keñeşniñ erkânını deñiştirgenini añlamay. Keñeşke Meclisniñ olğanı-olacağı sekiz azası kirsetilgen.

“Men bu qarar angi noqtai nazardan qabul etilgenini bilmeyim, amma o zaman men doğr

u qarar alğanıma eminim. Akimiyet daima Meclis ile dialogda bulunmaqnı devam etmesi ve bu muntazam sürette olması kerek, çünki dialogsız normal ayat olamaz. Eñ yüksek seviyede al etilmesi zarur olğan meseleler pek çoq. İşbirlik olğan yerde munasebet de başqaca ola”, – dedi L.Kuçma.

Şunı hatırlatmalı ki, Ukraina Prezidenti L. Kuçmanıñ 1999 senesi mayıs 18-deki №518/99 “Qırımtatar halqı vekilleriniñ keñeşi aqqında” qararına binaen ve “qırımtatar halqınıñ yerleştirilmesi ve ukrain cemiyetine qatılmasınen bağlı siyasiy, sotsial, medeniy ve iqtisadiy meselelerniñ operativ çezilmesini teminlemek maqsadında, Qurultayda saylanğan Meclis statusınıñ belgilenmegeni sebebinden Ukraina Prezidenti yanında konsultativ-muzakere organı sıfatında Qırımtatar halqı vekillerinden ibaret keñeş meydanğa ketirilgen edi. Aynı şu Ferman ile Qırımtatar halqı vekilleriniñ keñeşi qurulıp, oña Qurultayda saylanğan Meclis azalarınıñ episi kirsetilgen edi.