Qırımtatar studentleri Türkiye Cumhuriyeti Şimaliy Qıbrızdaki Yaqın şarq universitetine oquvğa kettiler

17 Sentâbr 2013

2013 senesi sentâbr 17 künü Milliy Meclis Tasil ve medeniyet idaresiniñ başı, “Maarifçi” birleşmesiniñ reisi Safure Kacametova Türkiye Cumhuriyeti Şimaliy Qıbrızdaki Yaqın şarq universitetine kirgen dört nefer studentni oquvğa ozğardı.

Belli ki, 2009 senesi Levkoşa şeerinde Milliy Meclis reisi Mustafa Cemilev ve Şimaliy Qıbrızdaki Yaqın şarq universitetiniñ rektorı Suat Günsel imzalağan añlaşmağa köre universitet er yılı qırımtatar studentleri içün 3-4 yer ayıracaq. Yarış neticelerine köre seçilgen Sabriye Abduraşitova, Erol Abdulcelilov, Dilâra Samedinova ve Akim Ümerov 2013 senesi universitetniñ studenti oldılar, daa eki student ise magistr unvanını qazanacaqlar.
Safure Kacametova Milliy Meclis adından studentlerge oğurlı yollar, muvafaqiyetli ve mahsuldar oquvlar tilep, bilgi saibi olıp evge qaytmalarını istedi.