Meclis reisi Mustafa Cemilev Ukraina Medeniyet naziri Leonid Novohatko ile körüşti

05 Sentâbr 2013

Sentâbr 5 künü Ukraina halq deputatı, Meclis reisi Mustafa Cemilev Ukraina Medeniyet naziri Leonid Novohatko ile körüşti.

Körüşüvde esasen halq deputatı M. Cemilev tarafından şu yılnıñ iyül ayında cedvelge kirsetilgen Ukrainanıñ “Ukraina devlet etnik milliy siyaseti köntseptsiyası aqqında” Qanunı leyhası, bunıñ kibi de Ukraina Nazirler kabineti işlegen aynı mevzudaki Qanun leyhası meselesi muzakere etildi.

Muzakere devamında Medeniyet naziri etnik siyaset saasında devlet siyasetini şekillendirmek içün temel yaratqan vesiqanıñ qabul etilmesine büyük emiyet bergenini bildirip, etnik siyaset memleket mustaqilliginiñ 22 yılı devamında alâ daa qabul etilmegenini teessüf ile qayd etti.

Öz nevbetinde Mustafa Cemilev evel aytqan sözlerini tekrar tasdiqladı, yani eger eki leyhada müim meselelerde fikir bir olsa o, Ukraina Nazirler kabineti teklif etken leyhanıñ qabul etilmesini tezleştirmek maqsadında Ukraina halq deputatı olaraq öz leyhasını keri alır. Mustafa Cemilevniñ böyle pozitsiyasını Ukraina Medeniyet naziri maqulledi.

Körüşüv iştirakçileri bunıñ kibi de Qırımnıñ medeniy inkişafına dair diger müim meselelerni de muzakere ettiler.
 

Malümat içün: 2013 senesi iyül 5 künü Ukraina halq deputatı, Meclis reisi Ukraina Yuqarı Şurasında Ukrainanıñ “Ukraina devlet etnik milliy siyaseti köntseptsiyası aqqında” Qanunı leyhasını cedvelge qayd ettirdi. Mezkür leyhağa yazılğan añlatuv tezkeresinde böyle denile: “Devlet etnik siyaseti köntseptsiyası qanunâratıcılar, devlet hadimlerine devlet etnik siyasetniñ printsipleri, maqsad ve yönelişleriniñ bir añlamını bermeli. Böyleliknen, qanunlarda qapa-qarşı maddeler olmaz, yerlerde devletniñ milliy çoqluq ve milliy azlıq boyunca devlet siyasetiniñ öz bilgenlerine köre añlamalarına yol bermez”.

Qanun leyhası evel de Ukrainanıñ 6-ncı çağırılış parlamentiniñ muzakeresine halq deputatı M. Cemilev tarafından berilgen edi. Bunıñ kibi de böyle leyha Ukraina ükümeti tarafından da 2012 senesi mart ayında Yuqarı Şurağa taqdim etilgen edi.