Remzi İlyasov: M. Ben-Naim meni antisemitizmde qabaatlavını qup-quru saçma, dep sayam

03 Sentâbr 2013

2013 senesi avgust 31-de Meclis reisiniñ muavini, Qırım Yuqarı Şurasınıñ deputatı Remzi İlyasov Ukraina İçki işler nazirliginiñ Qırımdaki baş idaresine baqqan Aqmescit şeer bölügi vekillerine Mark Ben Naimniñ Qırım Prokurorı V.V. Pavlov, Ukraina İçki işler nazirliginiñ Qırımdaki Baş idaresiniñ reberi M.A. Slepanöv adına yazğan arizası boyunca öz fikirini añlattı. Öz arizasında Mark Ben-Naim Remzi İlyasov tarafından “açıqtan-açıq
milletlerara dava qozğamaq ve yeudiylerge nisbeten nefret” közetilgenini bildirip, onı “antisemitizm” içün cevapkârlıqqa çekmekni talap ete.

M. Ben-Naim öz arizasında böyle delil ketire – Remzi İlyasov 2013 senesi iyün 22 künü Aqmescitteki Ebediy alev abidesine çeçek qoyum merasimi munasebetinen Qırım Prokuraturasına muracaat etti. Mezkür arizada M. Ben-Naim “özüni qanunsız Meclis reisiniñ muavini, Qırım Yuqarı Şurasınıñ deputatı dep adlandırğan R. İlyasovnı Sovetler Birliginiñ Qaramanı ve Sotsialist emeginiñ qaramanı İosif Stalinniñ portretini numayış etken insanlarnıñ areketini prokuror tarafından nezaret etmekni talap etkeni içün cevapkârlıqqa çekilmesini teklif ete.

Belli ki, matem mitinginde fahriy qaravul, çeşit şiarlar qoyulıp, olarnıñ arasında stalinizmni propaganda etken soyları, cümleden Stalin portreti altında “Ulu Stalinge şan-şerefler!”, “Vatan içün! Stalin içün ögge, ücümge!” degen şiarlar da bar edi. Tedbirde Qırım ükümetiniñ vekilleri de iştirak ettiler. Uquqqoruv organları cellâtnıñ portreti ve Stalinni medh etken şiarlarnı çekip alacaq oldılar, amma halq deputatı S. Topalov organlarnıñ bu işine keder etti.

Evel öz arizasında Remzi İlyasov böyle yazğan edi: “öyle köründi ki, sanki Qırım ükümetiniñ vekilleri “Stalin portretine çeçekler qoydılar. Stalinizmni, Stalinni medh etmek Ukrainada iç kelişmegen bir arekettir”. Qırım Yuqarı Şurasınıñ deputatı Remzi İlyasov bunıñ kibi de zarur taqiqat keçirilip, suçlılarnı bu areketleri ve bunıñ kibi de militsiya hadimleriniñ işine keder etkenleri içün mesülietke çekmekni rica etti. Çünki dünya cemaatçılığı totalitar olğan faşizm ve stalin rejimlerini qaralay.

Remzi İlyasovnı Ukraina Cinaiy Kodeksiniñ 161-nci maddesine köre cevaprkârlıqqa çekilmesini talap etken Ben_Naim Stalinniñ yeudiy olğanını delil olaraq ketire.

“Madamki Remzi İlyasov stalinizmge qarşı eken, demek o bütün yeudiylerge qarşı” – cenap Ben-Naim işte böyle genial hulâsanı çıqardı.
Öz nevbetinde Remzi İlyasov “Ben-Naim adlı insannıñ uydurmaları”nı izaatlarken “Stalin, Gitler ve olarğa beñzerler aqqında aytırkenim iç bir zaman ve iç bir yerde olarnıñ milliy mensüplikleri aqqında tüşünmedim. Men stalinizm, natsizm, Stalinniñ şahsiyetine tabınuvnıñ propaganda etilmesine qarşı çıqtım, çünki bu insan millionlarnen suçsız adamlarnıñ ölüminde qbaatlıdır. Meselâ, Ukraina mahkemesi onı ukrain halqınıñ soyqırımını ketirgen açlıqta qabaatlı, dep tanıdı- bu aqta Ukraina Telükesizlik hızmetiniñ saytında malümat berile. M. Ben-Naim meni yeudiylerge qarşı, dep suçlağanı saçmalavdan başqa şey degil”.

Malümat içün: Meclis reisiniñ muavini, Qırım Yuqarı Şurasınıñ deputatı Remzi İlyasov Qırım Prokuraturasına 2013 senesi iyün 22 künü Aqmescit şeeri soqağından Stalin portretinen keçken insanlarnı mesülietke çekmekni talap etip, ariza yazğan edi.