Meclis reisi Mustafa Cemilev ve Vernadskiy adına Tavriya Milliy universitet rektorı Nikolay Bagrov qırımtatar ve şarq filologiyası fakultetindeki problemlerni çezüv yollarını beraber qıdıralar

30 Avgust 2013

2013 senesi avgust 30 künü Meclis reisi, Ukraina halq deputatı Mustafa Cemilev ve Vernadskiy adına Tavriya Milliy universitet rektorı Nikolay Bagrov ile körüşti.

Qırımtatar filologiyası bölüginde ders saatleri qısqarğanı ve şu kafedra ocalarınıñ işsiz qaldırılğanları munasebetinen olğan körüşüvde TMU Qırımtatar ve şarq filologiyası fakultetiniñ ocaları, Meclis reisiniñ muavini, Qırım Yuqarı Şurasınıñ deputatı Remzi İlyasov, Meclisniñ Tasil ve medeniyet idaresiniñ başı, Qırım Yuqarı Şurasınıñ deputatı Safure Kacametova, Qırımtatar yazıcılar birliginiñ reisi Riza Fazıl, TMU rektor muavini Yelena Çuyan ve Qırımtatar ve şarq filologiyası fakultetiniñ dekanı Ayder Memetov iştirak ettiler.

Belli ki, TMUda Qırımtatar ve şarq filologiyası fakulteti 2002 senesinden berli çalışmaqta. Ocalar mında yalıñız arap, fars, türk tilleri boyunca degil de, qırımtatar tili ve edebiyatı boyunca mütehassıslarını da azırlaylar. Meclisniñ Tasil ve medeniyet idaresiniñ başı, Qırım Yuqarı Şurasınıñ deputatı Safure Kacametova qayd etkeni kibi fakultet ocaları em aliy, em de orta tasil oquv yurtları içün qırımtatar tilinde oquv ve metodik qullanmalarnı işlemekteler.

“Al-azırda fakultette 233 student kündüzki bölükte ve 49 talebe ğiyabiy bölükte tasil almaqta, – dep devam etti çıqışını S. Kacametova. – Qırımtatar edebiyatı kafedrasında bir namzetlik ve bir doktorlıq dissertatsiyaları qorçalandı, 2012 senesi kafedra faalliginiñ yüksek köstergiçleri qayd etildi”.

TMU rektorı N. Bagrovnıñ sözlerine köre fakultette studentler sayısınıñ eksilgeni sebebinden universitet artıq fakultetniñ faaliyetini teminlep olamay. “Şunıñ içün de biz faqat bu fakultette degil de, umumen universitetimizde iş yerlerini azlaştırmağa mecburmız”, – dep añlattı universitet rektorı. Nikolay Bagrov qırımtatar ve şarq filologiyası fakultetini “öz balası” dep sayğanını bildirdi ve fakultet hadimlerini saqlap qalmağa ve fakultetniñ inkişafına qoltutmağa azır olğanını qayd etti.

Meydanğa kelgen vaziyetni muzakere etkende Meclis reisi Mustafa Cemilev ve TMU rektorı Nikolay Bagrov meseleni al etmekniñ bir yolu olaraq Ukraina Tasil naziri D. Tabaçnikke muracaatta bulunıp, Qırımtatar ve şarq filologiyası fakultetiniñ ştatını finansirlemek içün Ukraina Devlet bücetinden maqsadlı sermiya ayırılmasını rica etmekniñ ğayet zarur olğanını seslendirdiler.

Meclis reisi M.Cemilev emin ki, esasen TMU rektorı N. Bagrovnıñ kendisiniñ qoltutuvı sayesinde açılğan fakultetniñ faaliyeti Ukrainada qırımtatar halqınıñ medeniyeti, tili ve tasiliniñ saqlanması ve inkişafı içün pek müim ve devlet seviyesinde destekke muhtacdır.