Umumavropa stalinizm ve natsizm qurbanları hatırası kününe bağışlanğan kütleviy sürgünlik ve qatller qurbanlarınıñ hatırasını saqlamaq içün keçirilgen Bütünqırım informatsion piketniñ QARARI

23 Avgust 2013

74 yıl evelsi 1939 senesi avgust 23 künü Moskvada eki totalitar devlet – kommunistik SSSR ve faşist Almaniya arasında “Ribbentrop-Molotov paktı” diye adlandırılğan añlaşma ve muqaveleler imzalanmasınen insaniyet Ekinci dünya cenki içine çekildi.

Millionlarnen insan ve halq qurbanları, olarğa nisbeten yoq etüv devlet siyaseti qullanılğanı, – faşist Almaniyası ve kommunist SSSR totalitar rejimleri cinayetiniñ aqibetidir. Cenkten soñki Avropa halqları tarafından keçken asır facialarınıñ sebepleri ve aqibetlerini añlamaları HH asırnıñ eñ büyük afatı olaraq kommunist ve natsist rejimleri tanılmasına ketirdi. SSSR kommunist rejimi cinayetlerini uquq ceetinden qaralamaq içün areket, bu cinayetlerniñ tekrarlanmamasını teminlemek umumavropa kölemini aldı. Avropa cemiyeti keçmişteki totalitar rejimniñ yuridik ve tarihiy sıfatını köstermek oğrunda birleştirip, keçmişteki facialar yüz bermesi ihtimalını imkânsız yapmaqnı halqara seviyede pekitmek oğrunda öz küçlerini birleştirdi.

Aynı zamanda Ukraina devleti bu umumavropa areketlerinden çette qalıp, cemiyetni SSSR totalitar rejimi aqibetlerinden arındırmaq içün iç bir şey yapmağanından ğayrı memleket parlamenti minberinden stalinizm ve natsizmni açıqtan-açıq maqtalmasına, millionlarnen qurbanlarnıñ hatırası aqaret etilmesine iç bir türlü mania olmay.

Qırımnıñ tamır halqını yoq etüv telükesi altına bıraqqan sürgünliki ve aqibetlerini aqlamaq içün stalinizm tarafdarları soñki vaqıtta Qırımda aktivleşmesi akimiyetniñ qırımtatarlarğa nisbeten aqsımlav siyaset qullanğanınıñ neticesidir.

SSSR kommunist rejimi cinayetlerini ve şu cinayetni yapqan, qırımtatarlarnıñ qaytması, yerleşmesi ve aqlarınıñ tiklenmesine keder etken şahıslarnı üküm etken qanunlarnıñ qabul etilmemesi Ukrainada insan aqları ve serbestligini tolusınen teminlegen aqiqiy demokratik sistem yoqluğından delâlet bere.
Biz, Umumavropa stalinizm ve natsizm qurbanları hatırasına kününe bağışlanğan kütleviy sürgünlik ve qatller qurbanlarınıñ hatırasını saqlamaq içün keçirilgen Bütünqırım informatsion piketniñ iştirakçileri OSCE Parlament Assambleyası Vilnüste 2009 senesi iyül 3-te alınğan “Bölüngen Avropanı birleştirüv: 21 asırda OSCE regionında insan aqları ve serbestligini taqdirlev” deklaratsiyasına qoltutmaqnı devam etemiz. Totalitar rejimni red etken cemiyetniñ inkişafına kelecekte de qoltutmaq niyetinde biz Ukraina Prezidenti, Ukraina Yuqarı Şurası ve Ukraina Nazirler Kabinetinden Ukraina devleti insan ve halqlarnıñ aqlarını teminlevde halqara uquq normalarına riayet etmesini talap etemiz.

Bunıñ kibi de, biz OSCE, Avropa Şurası ve Avropa Birligine muracaatta bulunıp, kommunist rejimi tarafından onlarnen yıllar devamında soyqırımğa oğratılğan ve endi öz Vatanına qaytıp keleyatqan qırımtatar halqınıñ aqlarını ğayrıdan tiklenilmesine olduqça qoltutumalarına çağıramız.

Biz Avropa halqlarınen birlikte stalinizm ve natsizm qurbanlarınıñ hatırası ögünde temenna etemiz!

Bizim borcumız ve vazifemiz – barışıqnı saqlamaq ve bütün halqlar ve insanlarnıñ serbest ve er taraflı inkişafı içün munasip şaraitler yaratmaqtır.

Umumavropa stalinizm ve natsizm qurbanları hatırasıa kününe bağışlanğan kütleviy sürgünlik ve qatller qurbanlarınıñ hatırasını saqlamaq içün 2013 senesi avgust 23 künü Aqmescitte keçirilgen Bütünqırım informatsion pikette qabul etildi
 

2013 senesi avgust 23 künü

Aqmescit