Refat Çubarov: Eger militsiya rusiyeli aktör Paninniñ qırımtatarlar aqqında aytqan aqaretli sözleri içün çare körmese, cemiyetimizniñ er angi «maraz» ögünde zayıflığını tanımalı

21 Avgust 2013

Milliy Meclis reisi Mustafa Cemilev “Krım.Kommentarii” neşirine izaat berirken Amerikada böyle sözler içün rusiyeli aktör Panin çoqtan aspke alınır edi, dedi.”

Meselâ, AQŞda böyle çıqış içün çoqtan apste yatar edi. Bu açıqtan-açıq ırqçılıqtır! Ebet, Rusiyede bu keçerli, olar kavkaz milletine mensüp insanlarnı aqaretlep, aslı da cezasını çekmeyler, – dedi M. Cemilev. – Amma o, başqa devlet hududında olğanını añlamaq kerek. Tabiiy ki, uquqqoruyıcılar bu areketke seslenmeliler”.

Amma M. Cemilevniñ aytqanına köre, böyle areketlerge meclis seslenmek meramında degil. “Eger biz er bir piçniñ sözlerine cevap berecek olsa, tek şunıñnen oğraşır edik”, dedi o.

Öz nevbetinde Meclis reisiniñ birinci muavini Refat Çubarov emin ki, “eger Qırım sakinlerinden biri Moskvada ya da Rusiyeniñ başqa yerinde bulunğanda Panin qırımtatarlarğa nisbeten söylegen aqaretlerinden eñ azını, deyik, ruslar aqqında aytsa, bizni Rusiye sıñırları artına köterip atar ediler. Bu alda, bu doğru olur edi”

Rusiyeli aktör Paninniñ qırımtatarlarnı aqaret etkeni ve özüni alıp barğanını izaatlarken o, Facebookta özüniñ şahsiy saifesinde yazdı. “Maña jurnalistler çañ qaqıp, ne yapayıq, bütün qırımtatarlarğa nisbeten bildirilgen aqaretlevlerge nasıl sesleneyik, dep soraylar, – yaza Çubarov. – Ebet, bu sualni birinci nevbette uquqqoruv organlarına, deyik, militsiyağa, bermek kerek. Faqat olar yüz bergen adiseniñ inceliklerini ögrenmek ve kütleviy matbuat vastalarınıñ haberlerine seslenmek içün qanun bergen aq ve vazifege maliktirler”.

Aynı zamanda Meclis reisiniñ birinci muavini, Qırım Yuqarı Şurasınıñ deputatı R. Çubarov şunı da qayd etti ki, “Eger militsiya rusiyeli aktör Paninniñ qırımtatarlar aqqında aytqan aqaretli sözleri içün çare körmese, cemiyetimizniñ Ukraina vatandaşlarına nisbeten pis areketlerge yol bergen er angi “maraz” ögünde zayıflığını tanımalı. Rabbimiz qorçalasın, linçler başlanması mümkün!”

Şunı hatırlatmalı ki, Aluştada avgust 20 künü rusiyeli aktör Aleksey Panin yol qazasına oğradı. Bu aqta “Vesti” gazetası yaza. Adisege izaat bergen Panin: “Artımızdan tatar balası kelip uruldı. Siz tatarlarnı bilesiz de?! O, suçlı edi, men oña, kel meseleni çezeyik, maşinañ atta tırnalmadı bile, dedim, lâkin razı olmadı, bizden para almağa istedi. Ya o tatar balası da, men oña şamar yandırdım, bunıñnen iş bitti”.