Qırımtatar halqı Meclisiniñ yolbaşçıları 10-ncı Bütündünya ukrainler kongressiniñ delegatlarını açılışınen hayırlap, mahsuldar çalışmalar tilediler

20 Avgust 2013

BÜTÜNDÜNYA UKRAİNLER KONGRESSİNİÑ DELEGATLARINA

Bütündünya ukrainler kongressiniñ sayığılı delegatları!

Sizlerni 10-ncı Bütündünya ukrainler kongressiniñ açılışınen hayırlaymız!

Eminmiz ki, bütün dünyadan ukrain cemiyetiniñ çoqdegerli vekilleriniñ şanlı Lvov şeerinde toplanması ukrain milletine ve çoqmilletli ukrain cemiyetine demokratik Ukrainanı inkişaf ettirüvde yañı küç ve ğayret berir.

Qırımtatar ve ukrain halqları 20-nci asırda totalitar kommunist rejimniñ hışımına oğratılıp, açlıq, sürgünlik ve cezalar aqibetinde biñlernen insanlar qurban kettiler.

Yüce Rabbimizge şükürler olsun ki, halqlarımız dayandılar, qırılmadı ve bükülmediler, aksine öz serbestligi ve tuvğan yurtunda yaşamaq aqqı içün küreşte daa ziyade pekindiler. Öz halqlarınıñ serbestligi içün küreşken biñlernen ve biñlernen küreşçilerimizni büyük itiram ile añayıq!

Bugün bizni böyle bir Ukraina devletini qurmaq istegi birleştire ki, onda ukrain milleti, tamır halqlar ve milliy azlıqlarnıñ serbest inkişafı içün bütün şaraitler yaratılsın. Eminmiz ki, beraber biz başqa bir maqsadımız – Ukrainanıñ Avropa halqlarınıñ muabbet ailesi olğan Avropa Birligine kirmesine de irişirmiz.

Bilemiz ve inanamız ki, bütün bu maqsadlarnı kerçekleştirirmiz, çünki halqlarımıznıñ tarihiy keçmişi Ukrainanıñ eki tamır halqları – qırımtatarlar ve ukrainlerniñ küçlerini birleştirmesi daima yeñişlerge ketirgeninden delâlet bere.

10-ncı Bütündünya ukrainler kongressiniñ delegatlarına mahsuldar çalışmalar tileymiz!

 

Qırımtatar halqı Meclisiniñ reisi,

Ukraina halq deputatı                                                Mustafa Cemilev



Bütündünya qırımtatarlar kongressi

Koordinatsion keñeşiniñ reisi                                    Refat Çubarov
      

g. Aqmescit
2013 senesi avgust 20