Meclis temsilcisi Avropa Parlamenti deputatlarına Meclis reisi M. Cemilevniñ Halqara forum meselesi aqqında mektübini berdi

11 Iyül 2013

Temsil etilmegen halqlar ve milletler birliginiñ Prezidiumı Halqara forum aqqında Beyanat qabul etti. 2013 senesi iyül 6-7 künleri Temsil etilmegen halqlar ve milletler birliginde Meclis vekili A. Egiz birlik prezidiumınıñ Brüsselde ötkerilgen 15-nci toplaşuvında iştirak etti.

Prezidiumnıñ nevbetteki toplaşuvı teşkilâtnıñ keçken yarım yıl zarfında yapqan işleri ve 2013 senesiniñ soñuna faaliyet planı muzakere etti.

Toplaşuvnıñ kün tertibinde teşkilâtqa kirmege istegen namzet halqlarnıñ arizaları, bazı iştirakçi halqlarnıñ statusı baqıldı, çünki teşkilâtta iştirak etmekniñ şartı iştirakçileriniñ zorluqsız küreş usulları ve teşkilât ögünde mecburiyetlerni becermesidir.

Teşkilât faaliyetiniñ müim yönelişlerinden biri Avropa institutsiyaları ve BMTnıñ dahil bölüklerini Teşkilât azalarınıñ meselelerini çezüvge celp etmektir.

Temsil etilmegen halqlar ve milletler birliginiñ Prezidiumı Ukrainada qırımtatar halqınıñ aqlarını tiklev boyunca halqara forum keçirüvde Ukraina ükümetine Halqara cemaatçılıq tarafından yardım kösterilmesi munasebetinen Beyanat qabul etti.

Abduraman Egiz bunıñ kibi de Gollandiyada qırımtatar diasporası vekilleri Mehmet Pekçan ve Resul Eret ile körüşip, Qırımdaki siyasiy vaziyette deñişmelerni muzakere ettiler