Moskvada belli uquqqoruyıcı, sovet dissidenti, “Memorial” Uquqqoruv merkezi keñeşiniñ azası Aleksandr Lavut ile vedalaştılar

26 Iyün 2013

2013 senesi iyün 26 künü Moskvada belli uquqqoruyıcı, sovet dissidenti, “Memorial” Uquqqoruv merkezi keñeşiniñ azası Aleksandr Lavut ile vedalaştılar.

Vedalaşuv merasimi “Memorial” Uquqqoruv merkezi binasında olıp keçti

Qırımtatar halqı dostunıñ cenazesine Qırımdan milliy areket veteranları. Milliy Meclis azaları Zevcet Qurtümerov ve Sinaver Qadırov, ve bunıñ kibi de ATR kanalında “Tarih sedası” programmasınıñ alıp barıcısı Gülnara Bekirova keldiler.

Cenazede Aleksandr Lavutnıñ eñ sadıq arqadaşı, refiqası Sima Börisovna, bala ve torunları, çoqtan-çoq dostları, meslekdeşleri, sovet dissidentleri Sergey Kovalev ve Aleksandr Podrabinek, Moskva qırımtatar cemiyetiniñ başı Mustafa Mühteremov, moskvalı jurnalist Ayder Mujdabayev, Bütündünya qırımtatarlar kongressi koordinatsion keñeşiniñ azası Enver Ramazanov ve digerleri bulundılar.

Milliy areket veteranı Zevcet Qurtümerov Lavutnıñ yaqın dostu, Milliy Meclis reisi Mustafa Cemilevniñ adından taziye bildirdi.

Meclis ve Moskva qırımtatar cemiyetinden qırımtatar ve rus tillerinde “Aleksandr Lavut – Ebediy hatıramızda”, “Aleksandr Lavut daima qalbimizde” sözler yazılğan gülçemberler qoyuldı.

Malümat içün: iyün 23 kun. Moskvada 84 yaşında Moskvada belli uquqqoruyıcı, sovet dissidenti, “Memorial” Uquqqoruv merkezi keñeşiniñ azası Aleksandr Lavut vefat etti.

Aleksandr Lavut qırımtatar halqınıñ hatırasında insan ve halqlarnıñ aqlı içün ateşin küreşçi olaraq ebediy saqlanıp qalır. Qırımtatar halqı küreşine onıñ issesi büyük. Qırımtatar halqınıñ Vatanğa qaytuv areketine bağışlanğan “Vaqialar hronikası”nıñ 31-nci sanını o deyerlik bir özü azırladı.
Fotoresimler Facebooktan Gülnara Bekirovanıñ şahsiy saifesinden alındı