Meclis reisi Mustafa Cemilev Litvaniya Seyminiñ reisi Vidas Gedvilas ile körüşti

26 Iyün 2013

2013 senesi iyün 26 künü Qırımtatar halqı Meclisi delegatsiyasınıñ Litvaniyağa iş ziyareti çerçivesinde Vilnüste Meclis reisi Mustafa Cemilev Litvaniya Seyminiñ reisi Vidas Gedvilas ile körüşti.

Körüşüvde bunıñ kibi de Meclis reisiniñ birinci muavini Refat Çubarov, tışqı alâqalar bölüginiñ başı Ali Hamzin, Qurultay delegatı, Kiyevdeki qırımtatar cemiyetiniñ başı Aslan Ömer Qırımlı, Seym reisiniñ tışqı siyaset meseleleri boyunca yardımcısı Mantvidas Bekâşüs ve Litvaniya tatarları cemiyetiniñ başı, Meclisniñ Litvaniyadaki temsilcisi Adas Yakubauskas iştirak ettiler.

Meclis reisi Mustafa Cemilev Seym reisi Vidas Gedvilasqa qırımtatar halqınıñ bugünki vaziyeti ve Halqara forumğa azırlıq ketişatı aqqında malümat berdi.

“Litvaniya Avropa Birliginiñ Keñeşinde reislik yapacağı, 2013 senesi noyabr ayında Avropa Birligi-Ukraina assotsiatsiya aqqında añlaşma imzalanacağı bizge Avropa Birligi qırımtatar halqı aqlarınıñ tiklemek meselesine ayrıca emiyet berecegine ümüt bağışlay, – dep qayd etti Mustafa Cemilev ve Litvaniyanıñ qoltutuvında amelge keçirilebilmesi mümkün bir sıra tekliflerni de seslendirdi.

Seym reisi Vidas Gedvilas Litvaniya ve litvaniyalılar 2013 senesi noyabrde Ukraina Avropa Birligi ile Assotsiatsiya qurmaq boyunca añlaşmanı imzalavda samimiy muvafaqiyetler tileyler dedi. “İş oñundan kelmesi içün imkânlarımız olğanı qadar areket etermiz. Ebet bu yerde eñ müimi bu işniñ Ukrainada yaşağan milliy azlıqlarğa kelişikli olmasıdır. Bu munasebet ile qırımtatarlarnıñ meseleleri, bizge köre, Ukrainanıñ Avropa Birligine qatılması ile çezilecegine eminmiz. Demek, epimiz beraber Avropa Birliginiñ azası olğan Litvaniyağa bildirilgen tekliflerni amelge keçirmek usullarını bulmalımız”, – dedi Vidas Gedvilas.

Mustafa Cemilev ve Vildas Gedvilas Litvaniya vekilleriniñ Avropa Birligi institutları ve vazifedar şahısları qırımtatar halqına bağışlap 2013 senesi keçirecek tedbirlerde iştirakine dair meselelerni muzakere ettiler.