Mustafa Cemilev: Türkiye Baş naziri Recep Erdoğannıñ istifağa çıqmasına obyektiv sebep yoqtır

19 Iyün 2013

Türkiye Baş naziri Recep Erdoğannıñ istifağa çıqmasına obyektiv sebep yoqtır, dedi Milliy Meclis reisi Mustafa Cemilev “ye-Krım” agentligine , Türkiye şeerlerinde olıp keçken narazılıq aktsiyalarını izaatlarken.

M. Cemilev hatırlattı ki, İstanbulda Gezi parkında qurucılıqqa ealiniñ qarşı çıqması bu aktsiyalarnıñ sebepçisi oldı ve bu vaziyetten Türkiyede, yurt tışındaki muhalif küçler faydalandılar.

“Er şey medeniy şekilde al etilecegine ümüt etem. Anda park meselesinden uzaq turğan, amma bu vaziyetni ortalıqnı qarıştırmaq içün qullanmağa ve Recep Erdoğannıñ istifağa yollanılmasına tırışqan küçler bar. Ükümran partiya çoqtan ükümet başında olıp, halqnıñ itibarını qazanabildi.

Demek, ealiniñ ekseri qısmı muhalifetke qoltutacağına ciddiy esas yoqtır”, –dedi Meclis başqanı M.Cemilev. Bunıñ kibi de o, dedi ki, Recep Erdoğan Baş nazir vazifesinde olğanda ükümet bütün devletniñ menfaatlarına uyğun olğan iş yapıcı ve aqılane siyasetni numayış etti.

Narazılıq aktsiyaları iştirakçilerine qıymet keserken Mustafa Cemilev qayd etti ki, olarnıñ arasında akimiyet siyasetinen razı olmağanlarnen bir sırada “aqqı tölenilgen” soyları da bar. “Anda sanat vekilleri, ziyalılar bar, amma vaziyetni qarıştırğan küçler de buluna. Ealiniñ ancaq 20 fayızınıñ qoltutuvına saip olğan muhalifler amelde kelişilmegen areketlerni köstereler”, – dedi M. Cemilev.

Meclis reisi M. Cemilev şunı da qoştı ki, Türkiye polisleri narazılarnı quvmaq içün başta küç ve közyaş aqıtıcı gaz qullanıp, addinden aştı. Ve bu areketlerge ait qıymet kesilmeli.

M.Cemilev memlekette kerginlikni yımşatmaq ve evelki vaziyetke qaytmaq park qurucılığı boyunca referendum keçirmek kerek, dedi.