Ukrainada Qırımtatar halqı qurultayına seçimler soñuna keldi

18 Iyün 2013

Ukrainada Qırımtatar halqınıñ qurultayına saylavlar soñuna keldi, amma yurt tışında saylavlar daa devam ete. Bu aqta Azatlıq radiosınıñ mühbirine Qurultayğa saylavlar boyunca Merkeziy saylav komissiyasınıñ reisi Zair Smedlâyev bildirdi.

Onıñ aytqanına köre komissiya al-azırda mart ayından iyün ayınıñ ortasına qadar devam etken rey berüvlerniñ neticelerine yekün çekmekte. Zayir Smedlâyev bu saylavlarda qırımtatar saylavcılarınıñ faalligi 2007 senesi saylavlarından bayağı yüksek olğanını qayd etti.

Resmiy olmağan malümatlarğa köre bugünge qadar 250 delegattan 198-i seçildi. Majoritar sistemi boyunca daa eki delegat Özbekistanda yaşağan Ukraina vatandaşları arasından saylanacaq. Qalğan 50 yerni ise proportsional sistem boyunca seçilgen delegatlar alacaq. Bu saylavlarnıñ neticeleri Özbekistanda seçimler keçken soñ belli olacaq.

Zair Smedlâyev haber etkenine köre, Özbekistanda sürgünlik yerlerinde yaşağan qırımtatarlar arasında Qurultayğa saylavlar keçirilecek kün daa belli degil. Bu hususta ait Ukraina ve Özbekistan qurumlarınen söyleşüvler alıp barılmaqta.

Qurultay – qırımtatar halqınıñ umummilliy qurultayı – qırımtatarlarnıñ ananeviy idare organı olaraq 1917 senesi şekillenip, 1991 senesi ğayrıdan tiklenildi. Delegatlar qarışıq sistem boyunca 5 yılğa seçileler.

Qurultay icra organı – Meclisni saylay. Soñki 20 yıl devamında oña belli uquqqoruyıcı Mustafa Cemilev reislik yapa. O, artıq Meclis reisligine namzetini köstermeycegini, amma ondan uzaqlaşmaycağını bildirdi.

Qurultaynıñ yañı erkânı özüniñ birinci toplaşuvını küzniñ başında keçirmesi beklenile, denile Azatlıq Radiosınıñ haberlerinde.