Meclis reisi Mustafa Cemilev: Oğlum Hayser öz canına qast eter, dep qorqa edim

30 May 2013

Mayıs 29 künü ötkerilgen matbuat konferentsiyasında Milliy Meclis reisi Mustafa Cemilev Hayser Cemilevniñ tarafından mayıs 27 künü Fevzi Edemov öldürilmesine alıp kelgen areketlerniñ sebepleri aqqında fikir yürsetti.

“Hayser bu işni ne içün yapqanını maña öyle de añlatıp olamadı”, – dedi Mustafa Cemilev matbuat konferentsiyasında. Bunıñ kibi Meclis başqanı oğlunıñ zeini bozuqlığı aqqında da bildirdi. “Ebet onıñ böyle problemleri bar edi, lâkin men o, öz canına qast eter, dep qorqa edim. Çünki o, bu aqta beş yıl evelsi saqçılarına da söylegen. Ta Tailandda çalışırken özüni yaramay duya başladı. Biz sağlığından qasevetlenip, onı İstanbulnıñ eñ nufuzlı klinikasında tedaviyledik. Ekimler zeini bozuq, dediler”, – dep añlattı Mustafa Cemilev.

Hayser Cemilevniñ babası oğlunıñ sağlığına balalıq çağındaki hatıralar, babası Mustafa Cemilev ve anası Safinar Cemilevanen beraber doğdığı Yaqutstanda sürgünlikte olğanı yaramay tesir etkenine emindir. “Şunı aytmaq isteyim ki, bu bala men hapiste eken Yaqutstanda dünyağa keldi. Anda onıñ ömüri adden tış edi. Onıñ közleri ögünde babasını künde bir qaç kere yaqalar, evlerini daima tinterdiler. Mında tekrar zorlap sürgün ettiler, ta sabiy ekende babası tutuqlanğan kamerada oldı. Devlet duşmanı olğanı içün onı balalar bağçasından çıqarıp attılar. Anasınen beraber keçirgen yuqusız geceleri…” – dedi M. Cemilev. – O, daima mudafaa tutqan, ayırılıp turğan bir insan edi. Bes-belli bütün bular öz tesirini kösterdi”.

2013 senesi mayıs 27 künü Milliy Meclis reisi, Ukraina halq deputatı Mustafa Cemilevniñ küçük oğlunıñ evinde qaza yüz berdi. Hayser Cemilev muqaytsızlığı sebebinden ateşli silâdan Fevzi Edemovnı öldürdi. Facia olğan künü Mustafa Cemilev onıñ ailesi tarafından taqiqat işlerini keçirüvde olduqça yardım kösterilgenini resmiy sürette bildirip taqiqat açıq ve bitaraf alınıp barılacağına ümüt beslegenini ayttı. Mayıs 29 künü Fevzi Edemovnıñ cenazesi qılındı. Fevzi Edemovnıñ ana-babasına hıtap etken Mustafa Cemilev evinde ne var ise rahmetli Fevzi Edemovnıñ ailesi ve balalarınen paylaşmağa azır olğanını bildirdi