Milliy Meclis vekilleri BMT yanında Ukrainanıñ Daimiy temsilcisinen körüştiler

30 May 2013

2013 senesi mayıs 29 künü BMT Tamır halqlar forumınıñ 12-nci oturımı çerçivesinde Meclis vekilleri Abduraman Egiz ve Ayla Baqqallını BMT yanında Ukrainanıñ Daimiy vekâlethanesinde BMTde Ukrainanıñ Vefqulade ve Toluvekâletli Elçisi Yu. A. Sergeyev qabul etti. Körüşüvde Vekâletlikniñ birinci kâtibi T. Kayuk ve üçünci kâtibi A. Şapoval iştirak ettiler. Bu aqta malümatnı BMT Tamır halqlar forumınıñ 12-nci oturımında iştirak etken A. Egiz berdi.

Körüşüv devamında BMT Baş assambleyası tamır halqlar dünya konferentsiyasında iştirak etmege azırlıq ve bunıñ kibi Meclisniñ Qırımtatar halqı meseleleri boyunca halqara forumnı qırımtatarlar sürgüniniñ 70 yıllığı munasebetinen kelecek yılda keçirüv ğayesi muzakere olundı.

Körüşüv çerçivesinde qırımtatar halqı aqlarını qorçalamaq maqsadınen halqara mehanizmlerden semereli qullanmaq boyunca añlaşma elde etildi.