Amerika Qoşma Ştatlarınıñ Ukrainadaki Elçiligi Qırımtatar halqınıñ meseleleri boyunca halqara forum keçirilmesiniñ tarafdarıdır

29 May 2013

Amerika Qoşma Ştatlarınıñ Ukrainadaki Elçiliginiñ ekinci kâtibi Stiven Peyc Milliy Meclisniñ reisi Mustafa Cemilev ile 2013 senesi mayıs 29 künü Bağçasarayda olıp keçken körüşüv vaqtında Halqara forumnı keçirüvnen bağlı müim meseleler ve bunıñ kibi de Qırım ve Ukrainada ağımdaki vaziyetni muzakere etildi. Cümleden, Meclis reisi Mustafa Cemilev Amerikanıñ diplomatına mayıs ayında Qırımda ötkerilgen kütleviy tedbirler aqqında tafsilâtlı ikâye etip, onıñ diqqatını Qırım ükümeti Meclisni em Hıdırlez milliy bayramnı, em sürgünlikniñ 69 yıllığı munasebetinen matem mitingini keçirüvde olduqça sıñırlamaq tırışqanına celp etti.

“Akimiyet partiyası akimiyet organlarını qırımtatar milleti vekillerinden temizlev yönelişini alıp, Halqara forumnıñ keçirilmesine er taraftan manialar qoyula, – dedi M. Cemilev. – Bundan da ğayrı, akimiyet qırımtatarlarnı aldatıp, halqımıznen degil de, Meclisnen davalı munasebette olğanını köstermek vazifesini qoydı.

Amerika Qoşma Ştatlarınıñ Ukrainadaki Elçiliginiñ ekinci kâtibi Stiven Peycniñ ricasına köre Meclis reisi Rusiye baş konsulı Andreyevniñ qırımtatar halqına nisbeten çıqışını izaatlarken, bu sözlerni o “aqıl zayıflığından” ayttı, dedi. Qırımtatarlarnıñ aqlarını teminlegen bir sıra qanuniy aktlar ve vesiqalarnı qabul etüv istiqballerini muzakere eterek M. Cemilev bugünde-bugün Ukraina ükümetinde Bişkek añlaşmasınıñ müddetini devam ettirmek meselesine qoltutqanlarını da bildirdi.

Bundan da ğayrı körüşüvde AqŞnıñ Ukrainadaki Elçisi Con Tefftnıñ yerastı qazılmalar içün mesüliet aqqında matbuatta maqalesine müsbet qıymet kesildi. Elçi Con Tefftniñ fikrince Ukrainanıñ Yerastı qazılma saaları aşkârlığınıñ teşebbüsine qoşulması devletniñ neft-gaz sektorından alğan kârnıñ paylaştırılması üzerinden cemaat nezaretini teminlemege yardım eter, bunıñ kibi de zengin tabiiy resurslarğa saip devletlerniñ sakinlerine şu resurslardan kerçek faydalanuvda yardımcı olur edi. Meclis reisi öz nevbetinde Ukraina bu deñişmelerge qoltutacağını ve özünde, cümleden Qırımda, tabiat resurslarını tapmaqnı yarımada sakinleri içün aşkâr keçirecegine ümüt bildirdi.

Meclis reisine hıtap etken Amerika Qoşma Ştatlarınıñ Ukrainadaki Elçiliginiñ ekinci kâtibi Stiven Peyc Amerikanıñ Ukrainadaki Elçisi Con Tefft Qırımtatar halqınıñ problemleri boyunca halqara forumnı keçirüv ğayesine qoltutqanını tasdiqlarken, qırımtatar halqınıñ zengin medeniy ananelerini saqlav qaluv ve onıñ siyasiy meseleleriniñ çezilmesini müim, dep sayğanını bildirdi.

Körüşüvde Kiyevde qırımtatarlar cemiyetiniñ başı Aslan Ömer Qırımlı ve “Qırım inkişafı vaqufı”nıñ baş müdiri Aleksey Skorik de iştirak ettiler.