Milliy Meclis reisi Mustafa Cemilevniñ oğlunıñ evinde yüz bergen qaza boyunca taqiqat açıq ve tarafsız olacaq

27 May 2013

2013 senesi mayıs 27 künü Meclis reisi, Ukraina halq deputatı Mustafa Cemilevniñ küçük oğlunıñ evinde qaza yüz berdi.

Hayser Cemilev muqayt olmağanı sebebinden ateşli silâdan adam öldürdi.

Qaza saat 15.30-da Bağçasarayda qayd etilgen silâdan qolaysız qullanğanı neticesinde yüz berdi.

Bu vaqıt Meclis reisi Aqmescitte edi, qaza aqqında oña üyken oğlu Eldar haber etti.

Mustafa Cemilev öz nevbetinde uquqqoruv organlarına haber etti ve olar qaza yüz bergen yerge yetip keldiler. Al-azırda qaza yüz bergen yerde facianıñ sebeplerini ögrenmek içün taqiqat işleri alıp barıla.

Meclis reisi Mustafa Cemilevniñ bildirgenine köre taqiqat işlerini alıp baruvda onıñ ailesi ve aqrabaları tarafından yardım kösterilip, taqiqat açıq ve tarafsız olacağına ümüt beslenile.

Meclis reisi Mustafa Cemilevniñ ailesi elâk olğan Fevzi Edemovnıñ yaqınlarına baş sağlığı bildirdi. “Bizim ailemiz Fevzi Edemovnıñ ailesinen beraber coyuq accısını paylaşıp, teren taziye bildire”, – Mustafa Cemilev.