Kommunist rejimi qurbanlarınıñ hatırasına aşırı yaldav iştirakçileri Sovetler Birliginiñ Kommunist partiyasını NÜRNBERG-2 mahkemesinde üküm etmekni talap eteler

25 May 2013

2013 senesi mayıs 22 künü saat 11. 00-de Mısırda Ris-Mohammed tabiat qoruğından başlap Qızıl deñizde Hurgada şeeri yalısına qadar 100 kilometrlik misilsiz yaldavda Ukraina rekordlar kitabınıñ rekordçısı, sabıq dissident ve siyasiy mahbüs Öleg Sofânik, Moskvalı sabıq siyasiy mahbüs Şamil Alimuradov iştirak ettiler.

Yaldav 1944 senesi mayıs 18-de Qırımdan sürgün etilgen qırımtatar halqı ve kommunist rejiminden zarar körgen halqlar qurbanlarınıñ hatırasına bağışlandı.

Yaldav iştirakçileri Ukrainada se sabıq sovetler hududındaki demokratik küçlerge bu vahşiy cinayetlerniñ kelecekte tekrarlanmasına yol bermemek içün bütün küçlerini sarf etmege çağırdılar.

“Bizim maqsadımız kommunizm mevkuresi ne derecede havflı olğanını köstermektir.

Ve bunı ille şimdi, kommunist ve sovetlerge meyilli teşkilâtlar baş köterip ükümetke keçmege, qanlı terror başlamağa tırışqanlarında yapmaq zarurdır.”, – qayd ettiler aktsiya teşkilâtçıları Yaldav başlanğan soñ Hurgada camileriniñ birinde ve köpt kilsesinde sürgün etilgenler ve kommunist rejimi qurbanlarınıñ ruhuna dua oquldı. Öleg Sofânik ve Şamil Alimuradovdan Milliy Meclis adına Beyanat yollanıldı

1944 senesi mayıs 18-de qırımtatar halqı Qırımdan sürgün etilgeniniñ 69 yıllığı, qırımtatarlar soyqırımı ve kommunist rejiminden zarar körgen halqlar qurbanlarınıñ hatırasına bağışlanğan yaldav iştirakçileriniñ

BEYANATI

ХХ asır tarihı qanlı cenkler ve insanlıqqa qarşı büyük cinayetlernen bellidir. Olarnıñ episi nice-nice insanlarnıñ başına yetkendir. Bu cinayetlerde eki totalitar rejim – faşist Almaniyası ve SSSR kommunist rejimi qabaatlıdır.

Natsist rejimi keçken asırnıñ yarısında Nürnberg mahkemesinde mahküm etilgen olsa, kommunist rejimi devrinde millionlarnen insanlarnıñ elâk olmasına sebepçi olğan Kommunist partiyası yapqan zulumı Nürnberg-2 mahkemesinde üküm etilmeli.

Bu rejim tarafından yapılğan şiddetli cinayetlerden biri bütün bir halqlarnıñ, toplumlarnıñ milliy mensüpligi boyunca Ekinci dünya cenkinden evel ve cenk vaqtında sürgün etilmesidir.

Sürgünlik aqibetinde tınç eali elâk oldı, halqlarnıñ milliy ve medeniy degerligi, özgünligi yoq etildi. Bu ise açıqtan-açıq soyqırımdır.

Ekinci dünya cenki devrinde 8 halq – Volgaboyu almanlar, qalmıqlar, qaraçaylar, çeçenler, inğuşlar, balqarlar, qırımtatarlar ve mesheti türkler sürgün etildiler.

Qırımtatar halqınıñ sürgün etilgenine bu künlerde 69 yıl oldı. Bu halqnıñ facialı taqdiri kommunist rejimi yapqan zulumnıñ misalidir.

SSSR dağılğanına 22 yıl olğan bir vaqıtta qırımtatarlar Qırımğa qaytuv ve yerleşüv işinde zorluq çekmekteler. Bunıñ sebepleri kommunist mevkuresi restavratsiya yapılıp, kene canlandırılğanındadır.

Bunıñ artında turğan küçler 1991 senesi Zulum imperiyası yıqılması içün oç almaq peşindeler.

Sovetler Birligi Kommunist partiyası ve onıñ cinaiy rejimi NÜRNBERG-2 mahkemesinde üküm etilsin!

Halqara ve sabıq sovetler hududındaki demokratik küçlerge KPSSni Nürnberg-2 mahkemesinde üküm etmek içün areket başlamaq teşebbüsini ögge sürmelerini rica etip muracaatt bulunamız.

Öleg Sofânik (Ukraina)
Şamil Alimuradov (Rusiye)

Mısır Arap Cumhuriyeti,
Hurgada ş. , 22 mayıs 2013 s