Ukrainanıñ bütün mekteplerinde soñki kere çañ qaqıldı

24 May 2013

2013 senesi mayıs 24 künü Ukrainanıñ bütün mekteplerinde soñki kere çañ qaqıldı

“Maarifçi” qırımtatar tasil hadimleri birleşmesiniñ reisi Safure Kacametova Ukraina ve Qırım Tasil nazirlikleriniñ malümatlarına esaslanaraq bu sene Ukrainanıñ umumiy tasil müessiselerini 278 980 mezun bitirgenini bildirdi.

Qırımda mektepni 29 biñden ziyade talebe bitirdi. Olardan 15 biñ neferi – 9-ncı ve 14 biñden ziyadesi 11-nci sınıf mezunlarıdır.

Bitirüv aqşamları 2013 senesi .iyün 1 künü keçirilip, iyün 1-den ta 27-sinece qadar mezunlarnıñ bilgilerine tıştan mustaqil qıymet kesilecek.

11-nci sınıf mezunları içün yeküniy devlet attestatsiyatsı mayıs 27-31 künleri olacaq. 9-ncı sınıfnı bitirgenler ise mayıs 28-den iyün 11-ge qadar imtian berecekler.

Safure Kacametova bildirgenine köre qırımtatar tilinde oqutqan mekteplerni bu sene 311 mezun bitire. Olarnıñ episi 11 sınıf oqudılar.

Şusı quvançlı ki, qırımtatar tilli mekteplerniñ 11 mezunı altın, 4 mezun ise kümüş medalge namzettirler.

Olarğa muvafaqiyet ve başarılar tileymiz!

 

Maarif-inform