Mustafa Cemilev: Milliy ananeler ve öz halqınıñ bugünki vaziyetine lâqayd qalmağan er bir insannıñ rolü samimiy teşekkürge lâyıqtır

21 May 2013

Belli ki, er yılı mayıs ayı Qırımda bir çoq kütleviy tedbirlernen toludır. Olarnıñ ötkerilmesi Qırımnıñ ve qırımtatar halqınıñ tarihınen belgilene. Bu tarihiy vaqialar sırasına em milliy bayramlar, em halqnıñ taqdirinde ayrıca yer tutqan mayıs 18 – sürgünlik qurbanlarınıñ hatıra künü kire.

Mayıs 20 künü Meclis reisi Mustafa Cemilevniñ teşebbüsi ile Hıdırlez bayramını azırlav ve keçirüv boyunca Teşkiliy Komiteti tarafından qırımtatarlarnıñ milliy bayramı Hıdırlezni ve Matem künü tedbirlerini keçirüvge isse qoşqan qırımtatar iş adamları, regional meclislerniñ reisleri, qırımtatar ansamblleriniñ reberleri ve milliy matbuat vastalarınıñ yolbaşçıları davet etildiler.

“Marakand” qavesinde olıp keçken bu körüşüvde Qırım musulmanlarınıñ müftisi haci Emirali Ablayev,Meclis reisiniñ birinci muavini Refat Çubarov, reis muavini Remzi İlyasov ve Hıdırlez bayramını azırlav ve keçirüv boyunca Teşkiliy Komitetiniñ reisi Emine Avamileva iştirak ettiler. Hıdırlez bayramınıñ keçirilmesine isse qoşqanlarğa Mustafa Cemilev Milliy Meclis adından Teşekkürnameler berdi.

“Milliy ananeler ve öz halqınıñ bugünki vaziyetine lâqayd qalmağan er bir insannıñ rolü samimiy teşekkürge lâyıqtır”, – dedi Mustafa Cemilev, körüşüv iştirakçilerine hıtaben. – Akimiyet tarafından halqımıznıñ asırlıq adetlerine deñişmeler kirsetmek ve insanlarnı “alternativ” bayramğa celp etmek areketlerine baqmadan biz “Şeherezada” medeniy-eglence merkezi yanında öz küçlerimiznen semedeşlerimiz ve Qırımnıñ çeşit milletleri sakinleri içün kölemli, şeñ bayram keçirebildik”.

Meclis reisi qırımtatar halqı soyqırımı qurbanlarınıñ hatırasına bağışlanğan merasimlerni keçirüv işine qoşqan isselerniñ müimligi ve emiyetini de ayrıca qayd etti.

Öz nevbetinde reisniñ birinci muavini Refat Çubarov mayıs 6 künü keçirilgen Bütünqırım Hıdırlez bayramınıñ keçirilmesine isse qoşqan er bir teşkilât ve er bir insannıñ issesini birer-birer qayd etti. Bular arasında “ATR” telekanalı ve “Elegans” reklam agentliginiñ informatsion ve reklam destegi, “Sim-Siti trans” i “STK”(Simferopol transport kompaniyası)nıñ naqliye hızmeti, Bağçasaray rayon devlet memuriyeti yolbaşçıları tarafından kösterilgen tehnikiy teminat, “Qırım inkişafı vaqufı” Hayriye fondınıñ kontsert programmasını teşkil etüvdeki yardımı, Moskva ve Kiyevdeki qırımtatar cemiyetleriniñ issesidir. Bunıñ kibi de yerli meclisler ve bayramğa kelgen semetdeşlerniñ faaligidir.

Çıqışta bulunğan iş adamları, kollektiv ve işhane vekilleri qayd ettiler ki, qırımtatar halqınıñ birligini, milliy adetlerimizni bozmağa istegenler aramızğa şına qaqmaq areketlerini quvetldendirgen bir vaqıtta halqqa fayda ketirmek er bir insannıñ boyun borcudır.

Körüşüv iştirakçileri Qırımnıñ ve qırımtatar halqınıñ çeçeklenmesi oğrunda ileride yapılacaq tedbirler hususında fikir paylaştılar.