Niderlandda qırımtatar diasporası sürgünlik qurbanlarınıñ hatırasını añdı

20 May 2013

2013 senesi mayıs 18 – qırımtatar halqınıñ matem künü Avropa Birligine kirgen devletlerde şu memleketlerdeki qırımtatar diasporası vekilleri Sürgünlik qurbanlarınıñ hatırasını añıp, Ukrainadan qırımtatar halqınıñ öz Vatanında aqlarını tiklemesini talap ettiler.

Ğarbiy Avropa qırımtatar medeniy ve yardımlaşma merkeziniñ reisi Mehmet Tütünci bildirgenine köre Gaagada mayıs 18 künü Ukraina elçiligi ögünde Sürgünlik qurbanları hatırasına miting keçirildi.

Niderlanddaki mitingde Niderland musulmanlarınıñ yolbaşçısı Ebubekir Öztüre, Niderland Avropa türk demokratları birliginiñ başı Veis Güngor, Türklerniñ İslâm medeniyeti derneginiñ başı Ali İhsan Unal bulundılar. Merasim sürgünlikte ve ğurbet ilde vefat etkenlerniñ ruhlarına dua oquvnen başlanıp, soñra merhumlarnıñ hatırası bir daqqa sukünet saqlavnen añıldı. Merasim iştirakçileri ögünde Ğarbiy Avropa qırımtatar medeniy ve yardımlaşma merkeziniñ reisi Mehmet Tütünci çıqışta bulunıp, qırımtatarlar sürgünlikte çekken meşaqatlarnı tarif etti ve merhumlarğa Allahtan rahmet tiledi.

Tütünci mitingniñ maqsadı Mogilövnıñ qırımtatarlarğa nisbeten munasebetine narazılıq bildirmektir, dep qayd etti ve bu meseleniñ çeziminde Ukrainadan ait tedbirler almasını beklegenlerini qoştı. Aktsiya iştirakçileri Ukrainanıñ Niderlanddaki elçiligine qırımtatar halqınıñ aqları qorçalanmasını talap etken mektüp yolladılar.

Mitingde iştirak etken Avropa Parlamentiniñ deputatı, tamırları qırımlı olğan Emine Bozqurt Qırımtatar halqı Meclisine hıtaben yazğan muracaatını oqudı, onda o, Qırım Nazirler şurasınıñ reisi A. Mogilövnıñ siyasetinden telâşlanğanını bildire.

Ukrainanıñ Niderlanddaki Elçisi Aleksandr Görin Nyü-Yorkta bulunghanı sebebinden mitingde iştirak etip olamadı, lâkin Ukraina elçisi olaraq kelecek yılda umumiy bir merasim keçirmekni teklif etti.