Qırımtatar halqı sürgünliginiñ 69 yıllığı munasebetinen Avropanıñ bir çoq şeerlerinde mitingler ötkerildi.

20 May 2013

Qırımtatarlar medeniyet ve yardımlaşma dernegi tarafından Avropada, Brüsselde, Buharestte, Parijde, Berlinde, Gaagada ve Varşavada Qırımtatarlar soyqırımı qurbanlarınıñ hatırasını añma merasimleri keçirildi.

Brüsseldeki miting Ukraina Elçiligi ögünde olıp keçti. Qırımtatarlarğa göñüldeşlik bildirmek içün mitingde Belçika Türk federatsiyasınıñ başı Ömer Zararsız, türk-musulman cemiyetiniñ başı Cafer Zorlu ve digerleri iştirak ettiler. Miting iştirakçileriniñ ellerinde qırımtatar halqınıñ lideri Mustafa Cemilevniñ portretleri bar edi. Mitingde bulunğanlarğa qırımtatar soyqırımı aqqında aytılıp, sovet rejimi qurbanlarınıñ ruhuna dua oquldı.

Milliy Meclisniñ temsilcisi Ahmet Ozay Vatandan tışta yaşağan yaş qırımtatar nesili ecdatları Qırımdan 1944 senesi mayıs 18 künü nasıl çıqarılğanı ve ayvan taşığan vagonlarda “ölüm yolundan” nasıl keçkenlerini bilmeleri içün elinden kelgenini yapacağını söyledi.

“Biz ğayıp etilgen Vatan, yoq etilgen halq aqqında aytamız. Bu aqta aytırkenmiz şunı qayd etmeli ki, bizim halqımıznı yoq etken devletniñ kendisi yoqtır. Bugün Ukraina devleti bar. Ukraina devletiniñ mustaqilli içün telükeli küçler mevcut. Ukraina qırımtatarlarnıñ qaytmasına qoltuttı. Amma aqsımlav, zorbalıq ve adaletsizlik ep devam ete. Biz qırımtatar halqınıñ aqları oğrunda areket etecekmiz”, – dedi Ahmet Ozay.