Qırımtatar yaşları 1944 senesi soyqırımı qurbanlarınıñ hatırasını Çatırdağnıñ töpesinde añdılar

12 May 2013

Mayıs 11 künü Qırımda Qırımtatar halqı sürgün etilgeniniñ 69 yıllığına “Çatırdağ -2013” aktsiyası ötkerildi.

Biñge yaqın insan 1527 metrlik yükseklikni zapt etmek içün Anğara keçitinde Çatırdağ eteginde toplandı. Aktsiya teşkilâtçılarınıñ aytqanına köre bu tedbirniñ mayıs 11 künü keçirilmesi tesaduf degil – aynı şu künü 69 yıl evelsi SSSR Mudafaa devlet komitetiniñ reisi İosif Stalin qırımtatarlarnıñ sürgün etilmesi aqqında fermannı imzalağan edi.

Bu sene aktsiyada Qırımtatar yaşlar merkezi, “Bizim Qırım”, “Emel”, “Qardaşlıq” , “Yaşlar şurası”, “Yaşlar sedası” ve bunıñ kibi de Qırımnıñ çeşit yerlerinden kelgen ocalar, studentler ve mektep talebeleri iştirak ettiler. Çatırdağ seferiniñ eñ kiçik iştirakçisi 3 yaşında, eñ büyügi ise 90 yaşında edi.

Çatırdağğa köterilmezden evel aktsiya iştirakçileri ögünde Bütündünya qırımtatarlar kongressiniñ prezidenti, Milliy Meclis reisiniñ birinci muavini Refat Çubarov, Qırım musulmanları müftisiniñ muavini Ayder İsmailov, Qırım Küreş federatsiyası reisiniñ muavini Seydamet Yağyayev çıqışta bulunıp, oğurlı yol tilediler.

Aktsiya iştirakçileriniñ ekseriyetini yaşlar teşkil etseler de, olarğa üyken nesil adamları da qoşulıp, irade ve istekleri ile yaşlarğa destek oldılar.
1527 metr yüksekliginde olğan Çatırdağnıñ eñ yuqarı noqtasına köterilgen aktsiya iştirakçileri sürgünlikte elâk olğanlarnıñ ruhuna dua oqup, qırımtatar milliy gimni “Ant etkenmen”ni yırladılar.