«Qırımoğlu – Bir halqnıñ küreşi» filmi qırımtatarlarnıñ lideri Mustafa Cemilevni bütün Türkiyede daa ziyade meşur etti

08 May 2013

“Qırımoğlu – Bir halqnıñ küreşi” vesiqalı filmi sayesinde qırımtatarlarnıñ lideri Mustafa Cemilev Türkiye halqı içün ibret olacaq. Bu aqta Türkiye Odalar ve Borsalar Birliginiñ başı Rifat Hisarcıklıoglu Mustafa Cemilevniñ adına mayıs 7-de yollağan mektübinde yaza.

Mart 28 künü Türkiyede Türkiye Odalar ve Borsalar Birliginde “Qırımoğlu – Bir halqnıñ küreşi” vesiqalı filminiñ taqdimi aqşamında Rifat Hisarcıklıoglu Mustafa Cemilevnen beraber olmaq, onı musafir etmekni kendisi içün büyük şeref ve sevinç olğanını söyledi. “Bu qadar ağır, amma aynı zamanda munasip bir hayat keçirgen insannıñ yanında bulunmaq bizim içün em büyük şeref ve ğururdır.

Türkiye baş naziriniñ muavini Bülent Arınçnıñ qoltutuvında Türkiyeniñ Devlet teleradiosı (TRT) tarafından çıqarılğan vesiqalı film sayesinde bütün Türkiye efsaneviy Mustafa Cemilevni daa ziyade tanımaq imkânına malik olur ve o, er keske ibret olur, – dep qayd etti Hisarcıklıoglu

Türkiye Odalar ve Borsalar Birliginiñ başı Mustafa Cemilevge hediye ettigi resim içün teşekkür bildirip, resim TOBB “Hatıra salonında” munasip yer alacağını yazdı.

Malümat içün: “Qırımoğlu…Bir halqnıñ küreşi” filmi qırımtatar halqınıñ 20-nci asırda facialı taqdiri, Qırımda milliy haqları oğrundaki küreşi ve bugünde-bugün Ukrainadaki vaziyetine bağışlanğan türkümniñ başlanğçıdır. Bu film Türkiye Devlet televideniyesiniñ (TRT) yetekçi alıp barıcıları ve vesiqalı film rejissörları Neşe Sarısoy Qaratay ve Zafer Qaratay ğayesiniñ ilkingisidir.