Emine Avamileva: «Hıdırlez-2013» bayramı pek yüksek seviyede keçti»

08 May 2013

Mayıs 6 künü Bağçasaray civarında Qırımtatar halqınıñ Meclisi ve Bağçasaray rayon devlet memuriyetiniñ qoltutuvında “Şeherizada” medeniy-eglence merkeziniñ (Aqmescit-Bağçasaray yolunıñ 25-nci kilometri) meydanında ötkerilgen Hıdırlez bayramı, qırımtatar halqı sürgünliginiñ 69 yıllığına bağışlanğan matem tedbirlerine azırlıq aqqında mayıs 8 künü keçirilgen matbuat konferentsiyasında Meclis reisiniñ birinci muavini Refat Çubarov, Meclis reisiniñ muavini Ahtem Çiygoz, Hıdırlez bayramını keçirüv boyunca teşkiliy komitet reisi Emine Avamileva ikâye ettiler.

“Biz Qırım ükümetiniñ planlarından haberdar olsaq da mayıs 6 künü keçirilecek Hıdırlez bayramına qoşulır ve alyernativ tedbirlernen sıñırlanmaq maqsadlarından vazgeçer, dep soñuna qadar ümüt ettik, – dedi Refat Çubarov. – Men, ükümetnen beraber bir arağa kelip, areketlerimizni birleştirir ve yıldan-yılğa çoqtan-çoq milletlerni birleştirgen Hıdırlez bayramı siyasetten tış olur, dep tüşüngenlerden biri edim.

Refat Çubarov emin ki, asırlar devamında şekillengen ve kütülgen milliy ve diniy bayramlarnıñ kününi iç bir türlü qanun ve emirlernen tayinlemek mümkün degil. “İnsanlarımıznıñ tertip-nizamlı olmaları Hıdırlezde öyle bir samimiy ve sıcaq müit yaratabildi ki, bayramnıñ er bir musafiri kendisini raat ve oñaytlı sezdi, – dep qayd etti R. Çubarov. – Er alda bu, tüşünip çıqarılğan uydurma qaidelerden yahşıdır”.

Öz nevbetinde Bağçasaray regional meclisniñ başı Ahtem Çiygoz keçken sene ötkerilgen Hıdırlezge azırlıqnı bu yılnıñkinen qıyaslayaraq, bu sene teşkiliy qısım bıltırkisinden bayağı yüksek seviyede olğanını qayd etti. “Bu yılı nasıldır siñirlenüv, artqaç areketler olmadı, er şey professional derecede azırlanğanı sayesinde er kes bayramnı şeñ ve güzel keçirdi”, – devam etti A. Çiygoz ve Qırım akimiyeti vekillerine bayramlarnı “buyruq” boyunca keçirüv ve SSSR rejiminiñ qaideleri endi çoqtan keçmişte qalğanlarını hatırlattı.

Teşkiliy komitet reisi Emine Avamileva bayram kerçekten de 100 fayızğa keçti, dep qayd etti. “Ebet, bazı bir eksiklikler de oldı, amma teşkiliy komitetniñ professional komandası olarnı tüzetmege tırıştı ve bayramnıñ güzel keçmesine iç bir şey keder etip olamadı, – esabat berdi E. Avamileva.
“Meselâ, bir çoq semetdeşlerimiz Aqmescitke pek erte kelip, demiröl vokzalında Hıdırlez olacaq yerge barğan avtobuslarnı saba saat 7-den 9-ğa qadar beklemege mecbur oldılar. Aqşam ise avtobuslar ta saat 20-ge qadar çalışıp, bayramnıñ bütün iştirakçilerini yerlerine yetkizdiler. Bağçasaray rayon devlet memuriyetiniñ esabatına köre tibbiyat yardımı sorap olğanı-olacağı 22 insan muracaat etken, – dedi E. Avamileva. – 22 kişiden 4-i yüklü qadınlar olıp, alsızlanğanlarına, bir qadın tayıp yıqılğanı ve bir de sportçı damarları tartışqanına şikâyet etken. Qalğan 18 kişiniñ episi qartlar olıp, küneşte qan basımları yükselgen”.

Teşkiliy komitetniñ esaplarına köre mayıs 6-da Hıdırlez bayramında 35 biñden ziyade insan iştirak etti. E. Avamileva bildirgenine köre bunı Hıdırlezge kelgen şahsiy arabalar ve musafirlerni taşığan naqliye vastalarınıñ sayısı kösterdi.
Kün devamında 35 ticaret noqtaları çalışıp, aş ve suv sattılar. “Bu sefer er şey yeterli oldı. Kütleviy matbuat vastalarınıñ bergen malümatlarına ve musafirlerniñ teessuratlarına köre Qırımtatar halqı Meclisi 2013 senesi mart 31 künü tesis etken Teşkiliy komitet azaları öz vazifelerini becerdiler, dedi E. Avamileva.