Meclis delegatsiyası Avropa qırımtatar cemaat teşkilâtlarınıñ toplaşuvında iştirak etti

03 May 2013

Mayıs 26-da künniñ ekinci yarısında Kölnde (Almaniya) Meclis reisi Mustafa Cemilev ve oña refaqatlıq yapqan Meclis tışqı alâqalar bölüginiñ başı Ali Hamzin, Kiyevdeki qırımtatar cemiyetiniñ başı Aslan Ömer Qırımlı, Qırımtatar halqı qurultayınıñ delegatı Rustem Ümerov Ğarbiy Avropa Qırımtatar medeniyet ve yardımlaşma derneginiñ toplaşuvında iştirak ettiler.

Körüşüvni Cemiyetniñ reisi Rafet Qaranlıq ve Meclisniñ Almaniyadaki temsilcisi, Bütündünya qırımtatarlar kongressi Koordinatsion keñeşiniñ Almaniyadaki qırımtatarlardan azası Ahmet Ozay teşkil ettiler ve alıp bardılar.

Körüşüvde Frantsiya, Gollandiya, Belçika ve Büyük Britaniyadaki qırımtatar dernekleriniñ vekilleri de iştirak ettiler. Körüşüvniñ baş mevzusı Qırımdaki vaziyetni muzakere etüv olaraq, ukrain akimleriniñ qırımtatar halqınıñ vekâletli organları olğan Qurultay-Meclis esapqa almamaq yoluna mingenlerine ayrıca diqqat etildi.