Meclis reisi Mustafa Cemilev Çehiya parlamenti Yuqarı palatasınıñ senatorı Yaromir Ştetina ile körüşti

29 April 2013

2013 senesi aprel 25 künü Qırımtatar halqı Meclisiniñ reisi Mustafa Cemilev Çehiya Parlamentiniñ Senatında bulunıp, keçmişte belli jurnalist ve uquqqoruyıcı, bugünde ise senator Yaromir Ştetinanen körüşti. Senator professional faaliyeti devrinde sabıq sovetler alanınıñ cemi “qızğın” noqtalarında oldı.

Bundan da ğayrı o halqara meseleler, mudafaa ve telükesizlik boyunca parlament kömiyetiniñ, bunıñ kibi de dünyada demokratiyağa qoltutuv komitetiniñ azasıdır. Meclisniñ tışqı alâqalar bölüginiñ başı Ali Hamzin, Kiyevdeki Qırımtatar cemiyetiniñ başı Aslan Ömer Qırımlı ve Qurultay delegatı Rustem Ümerov, Çehiyanıñ Ukrainadaki Elçiliginiñ siyasiy meseler boyunca mesleatçısı Lüboş Veselu iştirak etken körüşüv devamında Ukrainada siyasiy vaziyet ve Qırımda, bunıñ kibi de umumen Ukrainada, qırımtatar halqınıñ alı hususında fikir paylaşılıp, halqnıñ aqsımlanğanı da qayd olundı.

Meclis reisi M. Cemilevniñ aytqanına köre Qırımdaki soñki vaqialar, bilhassa Qırım ükümetiniñ başı A. Mogilövnıñ Meclisniñ faaliyetine keder etmek ve bunıñnen qırımtatar halqınıñ arasına şına qaqmaq areketleri telükeli ve provokatsion dep tanıldı. “Bütün bu adımlar Ukrainada qırımtatar halqınıñ taqdiri içün ve qırımtatar halqınıñ öz Vatanında aqlarını tiklev. Ukrainada onıñ telükesizligi ve inkişafını teminlev içün telâş doğura”, – dedi Meclis başqanı.

Keçmişte belli jurnalist ve uquqqoruyıcı olğan senator Yaromir Ştetina kendini Avropa devleti olaraq köstermege tırışqan Ukrainada qırımtatar halqı bugünde-bugün bulunğan vaziyetke taacüplendi. Çeh siyasetçisi Poloniyada Qırım platformasını meydanğa ketirmek teşebbüsine qoltutıp, onıñ qırımtatar halqı vaziyetinen halqara cemaatçılıqnı haberdar etecegine eminlik bildirdi.

Subetniñ soñunda Mustafa Cemilev senator Yaromir Ştetinanı Qırımğa davet etti.