Mustafa Cemilev: Avropa Birligi Ukraina içün telükesizlik, territorial bütünlik ve mustaqillik kefilidir. Memleketniñ bugünki reberlerine bu maqsadğa irişmek içün siyasiy irade kerek

29 April 2013

Pragada iş ziyaretinen bulunğan Qırımtatar halqı Meclisiniñ reisi Mustafa Cemilev 2013 senesi aprel 25-te “Praga seyahatçıları klubı”nda Praga cemaatçılığınen körüşti. Körüşüvni “NAVÝCHOD” (Şarqqa) mecmuasınıñ muarriri İvana Skalova ve “Şarq-Avropa programması” Demokratiya inkişafı ve insan aqlarını qorçalav merkeziniñ hadimi Aljbeta Hmelarova teşkilâtlandırdılar. 2011 senesi “NAVÝCHOD” mecmuasında “Qırımtatarlar – Avropanıñ alelhusus musulmanları” mevzusında maqale derc olunğan edi.

Mustafa Cemilev qırımtatar halqınıñ tarihı, Rusiye ve Sovet imperiyaları devrinde onıñ facialı taqdiri, Ukrainada qırımtatarlarnıñ bugünki vaziyeti, Qurultay-Meclis milliy sistemasınıñ faaliyeti, vazifesi ve maqsadları aqqında ikâye etti. Ayrıca Halqara forumnı keçirüv meselesi de muzakere olundı. Meclis reisi qayd etkenine köre, OSCE imayesi altında keçirilecek Halqara forum Avropa Birligi devletleri, Kanada ve Amerikanıñ qoltutuvını qazanabildi. “Bugün er şey Ukrainağa bağlı, eminim ki o halqara cemaatçılıq uzatqan elini tutmaq kerektir”, – dey Cemilev.

Meclis başı Mustafa Cemilev Ukrainanıñ Avropa Birligine qatıluv meselelerine dair, bunıñ kibi de şu seneniñ noyabr ayında Vilnüste Avropa ortaqlığı sammitinde Ukraina –Avropa Birligi birleşmesi boyunca añlaşma hususında fikirlerini bildirdi. “Ukrainada çezilmesi zarur olğan bir çoq problemlerge, şu cümleden qırımtatar milliy meselesine de, toqunmadan Vilnüste Avropa ortaqlığı sammitinde Ukraina –Avropa Birligi birleşmesi boyunca añlaşmanıñ imzalanması Ukraina ve ukrain halqı içün müim bir meseledir. Avropa Birligi Ukraina içün telükesizlik, territorial bütünlik ve mustaqillik kefilidir.

Memleketniñ bugünki reberlerine bu maqsadğa irişmek içün siyasiy irade kerek”, – dedi M. Cemilev.

Körüşüv iştirakçilerinden biri, alim, tarihçı Mihail Lebduşka Meclis reisi ve onıñ subetdeşlerine qırımtatarlarnen körüşüv teessuratlarınen paylaşıp, daa yaqında qorçaladığı “Bugünde-bugün qırımtatarlar cemiyetinde islâmnıñ rolü” mevzusındaki ilmiy işi aqqında ayttı. Bunıñ kibi de, o semetdeşlerini kommunist rejiminden zarar körgen qırımtatarlarnıñ aqları ğayrıdan tiklenilmesine qoltutmağa çağırdı.

Qırımtatar miloiy adetleri boyunca ötkerilgen körüşüvniñ soñunda Kiyevdeki qırımtatar cemiyetiniñ reisi Aslan Ömer Qırımlı ve Qurultay delegatı Rustem Ümerovnıñ teşebbüsi ile “NAVÝCHOD” mecmuasınıñ muarriri İvana Skalovanen mecmuanıñ qırımtatarlarnıñ meselesine bağışlanğan mahsus sanını azırlamaq qararlaştırıldı.

Malümat: “NAVÝCHOD” mecmuası 2001 senesi Pragada Karlov universiteti Slavân ve şarq-avropa tedqiqatları institutınıñ beş studenti İvana Skálová, Con Kravčík, Yveta Kenety, Agnes Kindlerová i Radek Novak tarafından meydanğa ketirildi.Neşir Merkeziy ve Şarqiy Avropa, Balqanlar, Baltiya, Kavkaz ve Merkeziy Asiya memleketleriniñ inkişafına bağışlana. Mecmuanıñ baş maqsadı yuqarıda qayd etilgen saalar aqqında bilgilerni kenişletmek ve kütleviyleştirmektir. Mecmua içtimaiy adiseler, siyaset, medeniyet, tarih, din, urf-adetler, seyahatlar, dünya milletiniñ yemekleri, insanlarnıñ kündelik qasevetleri aqqında ikâye ete.