Novoalekseyevka qasabasında qırımtatar tili regional til olaraq tanıldı

19 April 2013

Herson vilâyetiniñ Geniçesk rayonındaki Novoalekseyevka qasabasında aprel 19 künü olıp keçken qasaba şurasınıñ toplaşuvında qırımtatar tiline regional til statusını bermek qararı alındı.

“QHA” informatsion agentligi bildirgenine köre bu aqta Herson vilâyetinde regional meclis reisi Asan Aliyev haber etti.

Toplaşuvda bulunğan 22 deputatnıñ 18-i qararğa qoltutıp, 2 adam bitaraf qalğanlar. Böyleliknen Novoalekseyevkada bugünden itibaren qırımtatar tili regional til statusına maliktir. Asan Aliyevniñ aytqanına köre bu meselege qoltutmaq içün toplaşuvğa pek çoq qırımtatar, şu cümleden qartlar, kelgen.

“Bugün Novoalekseyevkada yüz bergen vaqia qırımtatar halqınıñ tarihında qalır. Sessiyanı qasaba şurasınıñ reisi Aleksandr Burkovskiy başladı. Soñra çıqışta bulunğan Geniçesk rayon devlet memuriyetiniñ reisi Seytumer Nimetullayev qırımtatar tili statusı aqqında aytıp, deputatlardan bu qararğa qoltutmalarını rica etti.

Onıñ sözlerinden soñ deputatlar çıqıp öz fikirlerini ifade ettiler. Başta ciddiy bir qapa-qarşılıq bar edi”, – tarif etti Asan Aliyev. Onıñ kendisi de öz çıqışında deputatlarğa tilniñ halq içün emiyetini añlatmağa tırışqan.

“Nutqımda Geniçesk rayonında pek çoq millet vekilleri barışıq içinde yaşağanlarını, qırımtatar tili ğayıp oluv telükesi altında bulunğan tiller cedveline kirsetilgenini ayttım”, – dep qayd etti Asanov.

“Qararnıñ alınması balalar bağçasında qırımtatar gruppalarını açmaq içün qanuniy temel yaratır, bunıñ kibi de mektepte qırımtatar tili derslerini arttırmaqnı rica etecekmiz”, – dedi Asanov.