Camalanıñ kontserti Hıdırlez bayramını yaraştırır

19 April 2013

Mayıs 6 künü Aqmescit-Bağçasaray yolunıñ 25-nci kilometrinde (“Şeherizada”) ötkerilecek qırımtatar milliy bayramı Hıdırlezge azırlıq çerçivesinde Teşkiliy komitet reisi Emine Avamileva “Qırım inkişafı fondı” hayriye teşkilâtınıñ bayramda meşur ukrain yırcısı Camalanıñ kontsertini maddiy desteklemek qararını bildirdi.

Camala bir saatlik kontsert berecek. “Qırım inkişafı fondı” hayriye teşkilâtı bildirgenine köre mezkür leyha “Kiyevde qırımtatar cemiyeti”niñ iştirakinde amelge keçirile.

Hıdırlez bayramında milliy folklor ansamblleriniñ iştiraki, çeşit yarmalıq, sergi, Küreş, ARM-resling, at qoşuları ve balalar içün attarktsion ve eglencelernen tolu unutılmaz bir programma olacaq.

Teşkiliy komitet bayramğa bütün Ukrainadan ve Qırımdan musafirlerni davet etip, baar bayramı müitine dalmaqnı teklif ete.