Meclis reisi Mustafa Cemilev Amerika Prezidenti Barak Obamağa Bostondaki terakt munasebetinen taziye bildirdi

17 April 2013

AMERİKA QOŞMA ŞTATLARINIÑ PREZİDENTİ
BARAK OBAMAĞA

PREZİDENT ALİY CENAPLARI!

Bostonda yüz bergen terrorist aktları aqibetinde insan qurbanları aqqında facialı haberni Qırımda büyük keder ile aldıq.

20-nci asırda şiddetli cezalarğa ve 1944 senesi biñlernen insanlarnıñ başına yetken sürgünlikke oğratılğan qırımtatarlar er angi ve nasıl olmasın sebep ve izaatlarnen aqlanılmağa tırışılğan zulum ve basqını keskin qaralamaqta.

Aprel 15 künü sadece Amerikada degil de, bütün dünyada Boston marafonı dep tanılğan sport bayramı vaqtında yapılğan terrorist akt, onıñ teşkilâtçılarınıñ alçaqlığı ve munafıqlığını köstere.

Musaadeñiznen Qırımtatar halqı ve onıñ toluvekâletli organı olğan Mecis adından ve şahsen kendi adımdan Sizge ve elâk olğanlarnıñ yaqınlarına teren taziyelerimni bildirmege, yaralanğanlarğa ise tez vaqıtta tüzelmelerini isteyim.

Eminim ki, Amerika Qoşma Ştatlarınıñ halqı bu sınavdan oña has ğurur ve mesülietliknen keçer.

Mustafa Cemilev,
Qırımtatar halqı Meclisiniñ reisi