Aprel 16 künü Aqmescitte belli qırımtatar şairi Eşref Şemi-zadeniñ ömür arqadaşı – Saide Ali-qızı Bodaninskaya defn etildi

16 April 2013

Merhume Moskvadan Qırımğa aprel 16-ğa keçer gecesi ketirilip, cenazesi “Abdal” mezarlığında qılındı. Cenaze merasimini Saide hanımnıñ oğlu Aydın Şemi-zade ve Qırım musulmanlarınıñ müftiligi teşkilâtlandırdılar. Böyleliknen, ömüriniñ büyük bir qısmını Vatantan tışta keçirgen Saide hanım doğğan toprağında defn etilmek vasiyeti yerine ketirildi.

Cenaze merasiminde Milliy Meclis ve qırımtatar cemaatçılığınıñ vekilleri iştirak ettiler.

Saide Ali qızı Bodaninskaya aprel 14 künü Moskvada 100 yaş ve 8 aylıqta vefat etti.

Şunı hatırlatmalı ki, Saide Bodaninskaya 1912 senesi dünyağa kelgen. Onıñ babası Ali-efendi Bodaninskiy – 1917 senesi qırımtatar milliy-demokratik inqilâp reberlerinden biridir, anası – Anife-hanım ise 1917 senesi noyabr ayında keçirilgen 1 Qırımtatar halqı qurultayınıñ dört delegat qadınlarnıñ biri edi.

Babası elâk etken soñ o, doquz yaşından emcesi Üsein Bodaninskiyniñ ailesinde östi. 1931 senesi o zamanda Kinematografiya institutında oquğan yaş şair Eşref Şemi-zade ile aile qurdı. Onıñ qocasını kommunistler eki defa aileden ayırdılar. Ekinci kere 1949 senesi Eşref Şemi-zade apske alınğan soñ Çinabadda Saide qolunda eki balasınen qaldı.

Soñra zar-zornen Zore aptesiniñ yanına Yangiyül şeerine köçti. Qocası 1955 senesi azat etildi. Bir qaç yıldan soñ aile Taşkente Yazıcılar birliginden kvartira aldı.

1978 senesi Eşref Şemi-zade Moskvada vefat etkende organlar onıñ Qırımda defn etilmesine qarşı çıqacaqlarını evelden köre bilgen Saide hanım oğulları Aydın ve Vildanğa: “Süyrep alıp ketsekte, babañıznı Qırımğa alıp ketermiz” Ali Bodaninskiyniñ qızı iradeli ve cesür qadın edi, oğulları da oña qoltuttılar ve Saide hanımnıñ qararı aqqında çetelli jurnalistler, medeniyet erbapları ve moskvalı dissidentlerge haber ettiler. Eşref Şemi-zade Vatanda cıyıldı.

Moskvadan kederli haber keldi: büyük ve maşaqqatlı ömür körgen, 8 ay evelsi 100 yaşını toldurğan Saide Ali qızı Bodaninskaya bu dünyanı terk etti.
O, Aqmescitte 1912-senesi doğdı. Saide apteniñ babası Ali Bodaninskiy 1917 senesi Qırımdaki milliy demokratik inqilâpnıñ yolbaşçılarından biri, anası Anife hanım –  diger dört qadın-qızlar safında 1917-senesi noyabrde çağırılğan I  Qurultaynıñ delegatı ediler.

1920 senesi babası elâq olğan soñ, o, 18 yaşınace emcesi – ilim ve medeniyetimizniñ körümli erbabı Üsein Bodaninskiyniñ evinde östi, büyükleşti.
1931 senesi Moskvada oquğan Saide hanım, Kinematografiya institutınıñ talebesi Eşref Şemi-zadenen tanış ola. Olar qoranta quralar.

Şair ve cemaat erbabı E. Şemi-zadeni eki kere NKVD-ciler yaqalap, apshanege bıraqqan ediler. Birinci kere bu Qırımda oldı. Ekinci sefer – sürgünlikten soñ, 1949 senesi, Çinabad rayon merkezinde. Saide hanım eki balanen qala. Fena vaziyetinden qurtulmaq içün Yangiyülde yaşağan tatası Zoreniñ yanına köçe.

1955 senesi Eşref ağa azat olunıp qayta ve birazdan olarnıñ qorantası Taşkentte yaşamağa başlay.

1978 senesi ağır ameliyattan soñ E. Şemi-zade Moskvada keçine. Saide hanım Aydın ve Vildan oğullarına, akimiyet buña keder etecegini bilip-turıp: “Süyrep alıp ketsek de, babañıznı Qırımğa alıp ketermiz”. O, öz israrlığı, cesareti ile maqsadına yetti. Oğulları da buña yardımcı oldılar.

Olarnıñ areketinen bu niyetleri aqqında Moskvalı dissidentler, babasınıñ eski dostları – medeniyet ve edebiyat erbapları, bir sıra çetel jurnalistler bilgenleri netice berdi. Akimiyet qarşı çıqalmadı. Eşref ağa Qırımda defn olundı.

Endi Qırımda, doğğan şeeri – Aqmescitte, oğlu Aydın ağa aytqanına köre, vasiyetine binayen, Saide apte defn olunmaqta…

Alla oña büyük ömür bağışladı ve büyük sınavlardan keçirdi. Saide Bodaninskaya bu sınavlardan şerefnen keçti.

Onıñ oğlu – professor, yazıcı, cemaatçı Aydın Şemi-zadege, torunlarına, diger yaqınlarına teren taziye bildiremiz ve baş sağlığı tileymiz.

Merhume Allanıñ rahmetinde bulunsın.

Milliy Meclis azaları.