Qırımda Ukraina Yuqarı Şurasınıñ İnsan aqları, milliy azlıqlar ve milletlerara munasebetler meseleleri boyunca komitetniñ seyyar toplaşuvı olıp keçti

11 April 2013

Aprel 11 künü Qırım Yuqarı Şurasında Ukraina Yuqarı Şurasınıñ İnsan aqları, milliy azlıqlar ve milletlerara munasebetler meseleleri boyunca komitetniñ seyyar toplaşuvı olıp keçti.

Körüşüvniñ teşebbüsçisi Komitetniñ milliy siyaset, tamır halqlarnıñ ve milliy azlıqlarnıñ aqları boyunca bölüginiñ başı, Meclis reisi Mustafa Cemilevdir

Toplaşuv işinde Ukraina Yuqarı Şurasınıñ İnsan aqları, milliy azlıqlar ve milletlerara munasebetler meseleleri boyunca komitetniñ başı Valeriy Patskan reberliginde şu komitet azaları, Komitetniñ milliy siyaset, tamır halqlarnıñ ve milliy azlıqlarnıñ aqları boyunca bölüginiñ başı, Meclis reisi Mustafa Cemilev, Ukraina Yuqarı Şurasınıñ İnsan aqları, milliy azlıqlar ve milletlerara munasebetler meseleleri boyunca komitet reisiniñ birinci muavini Andrey Şevçenko, Ukraina halq deputatı Aleksandr Moçkov, Qırım Yuqarı Şurasında “Qurultay-Ruh” fraktsiyasınıñ başı, Meclis reisiniñ birinci muavini Refat Çubarov, Meclis reisiniñ muavini Remzi İlyasov, BMT Aliy Komissarnıñ Beyazrusiye, Moldova ve Ukrainada regional temsilcisi Oldrih Andrısek, bunıñ kibi de Ukraina

Prezidentiniñ Qırımdaki daimiy temsilcisi Viktor Plakida, Qırım Yuqarı Şurasınıñ bir sıra deputatları ve Qırımdaki milliy cemiyetlerniñ vekilleri iştirak ettiler. Valeriy Patskannıñ bildirgenine köre toplaşuvnıñ baş mevzusı sürgün etilgenlerni yerleştirüv Programmasınıñ 2015 senesine qadar eda etilmesidir.

“Belli ki, milliy mensüpligine köre sürgün etilgenlerniñ problemi SSSRden Ukrainağa asabalıq olaraq qalğan eñ ciddiy problemlerden biridir, – dedi kiriş sözünde V. Patskan. – Bütün başlı halqlarnı sürgün etüv siyaseti eñ qaba şekilde kerçekleştirildi. İnsan ve bütün bir milletlerniñ aqları ayaq astına alındı. İç kimse insanlarnıñ aqlarını, kelecekte taqdirleri nasıl olacağını tüşünmedi ve bugün biz şu problemanıñ çezilmesini teminlemelimiz”.

Şunı hatırlatmalı ki, Kiyevde 2013 senesi mart 6 künü Ukraina Yuqarı Şurasınıñ İnsan aqları, milliy azlıqlar ve milletlerara munasebetler meseleleri boyunca komitetniñ azaları Qırımda siyasiy-içtimaiy vaziyetni köz ögüne alaraq Komitetniñ milliy siyaset, tamır halqlarnıñ ve milliy azlıqlarnıñ aqları boyunca bölüginiñ başı, Meclis reisi Mustafa Cemilevniñ nevbetteki toplaşuvnı Qırımda keçirmek teşebbüsine qoltutqan ve vaziyetni tüzetmek içün seyyar toplaşuv keçirmek qararını alğan ediler. “Eger vaziyet deñişmese seyyar toplaşuv Qırımda ötkerilecek”, degen fikir seslendirilgen edi parlament Komitetiniñ meclisinde.