Meclis reisi Mustafa Cemilev Ukraina tış işleriniñ naziri Leonid Kojara ile körüşti

05 April 2013

Aprel 4 künü Kiyevde Meclis reisi, Ukraina halq deputatı Mustafa Cemilev Ukraina tış işleriniñ naziri Leonid Kojara ile olğan körüşüvde “Qırım inkişafı vaqufı”nıñ baş direktorı Aleksey Skorik, Yurt tışındaki ukrainlernen bağlanuv ve medeniy-gumanitar işbirlik departamentiniñ direktorı Vladimir Yatsenkivskiy ve OSCE reisi gruppası reberiniñ muavini, Nazir Kâtibiyeti Departamenti direktorınıñ muavini Yevgeniy Tsımbalük iştirak ettiler.

Onda 2014 senesi Qırımtatar halqınıñ öz Vatanında aqlarını tiklev, Ukrainada onıñ OSCE imayesi altında inkişafı ve telükesizligini teminlev meselesi boyunca halqara forumnı teşkilâtlandıruv ve keçirüv. 1992 senesi Bişkekte imzalanğan añlaşmanıñ Ukraina tarafından müddetini uzatmaq ve keçken sene Ukraina Prezidenti ve Türkiye baş naziriniñ teşebbüslerine köre dört taraflı körüşüvniñ ekinci raundını keçirmek meseleleri muzakere etildi.

Mustafa Cemilev Qırımda meydanğa kelgen vaziyet, qırımtatarlarnı qaytaruv ve yerleştirüv, aqlarını tiklev meselelerinde Ukrainğa halqara yardımnı celp etmek meselesinde milliy qanunlar ve halqara qanunlar belgilegen çerçivede devlet siyasetini amelge keçirüvge Qırımtatar halqı Meclisiniñ pozitsiyası ve körüşini ifade etti.

Ukraina tış işleri naziri Leonid Kojara meseleni terenden ve tafsilâtlı bilgenini köstererek, devlet qırımtatar halqını sürgünlikten qaytaruv ve yerleştirüv işinde menfaatdar olğanını tasdiqlap, bunda halqara işbirlikniñ müsbet rolüni qayd etti.

Körüşüv vaqtında Leonid Kojara Bişkek añlaşmasınıñ müddetini uzatmaq içün zarur vesiqalarnı azırlav boyunca avalelerini seslendirdi. Bunıñ kibi de nazir Ukrainada dört taraflı körüşüvni teşkilâtlandırmaq ve keçirmek meselesi üzerinde çalışmağa azırlığını bildirdi. Halqara forumğa azırlıqnen bağlı vaziyet ise körüşüv iştirakçileriniñ muzakerelerinde müim yer alıp, bu saada yapılacaq işler belgilendi.

Tış işler naziri peyda olğan meselelerniñ çezimini tezleştirmek, Ukrainanıñ halqara seviyede pozitsiyalarını pekitmek yollarını tapmaq içün böyle körüşüvlerni muntazam sürette keçirmek kerekligini söyledi.

Meclis reisi Mustafa Cemilev Tış işler naziri Leonid Kojarağa körüşüv içün teşekkür bildirdi.