Meclis ve «Qırım inkişafı vaqufı» hayriye teşkilâtı birlikte 2013 senesine leyhalarnı kerçekleştirmekni devam eteler

22 March 2013

Mart 19 künü Aqmescitte “Qırım inkişafı vaqufı” hayriye teşkilâtı İdaresiniñ toplaşuvı olıp keçti. Vaquf matbuat hızmetiniñ haber etkenine köre teşkilâtnıñ 2013 senesine faaliyeti de muzakere etilip, vaquf işiniñ planı ve vaquf faaliyetine tüşken sermiyalarnıñ taqsimlenmesi tasdiqlandı.

Öz faaliyetini devam ettirerek vaquf Meclis ile İşbirlik añlaşması çerçivesinde tedbirler keçirilmesine, şu cümleden OSCE imayesi altında Halqara Forumnıñ ötkerilmesine qoltutmaq niyetinde.

“Qırım inkişafı vaqufı” hayriye teşkilâtı “Krımskiy Forum” uquqqoruyıcılarınıñ er sene körüşüvini azırlamaq ve keçirmek işine qoltutmağa azır olğanını da bildirdi.

Bundan da ğayrı Vaquf idaresi 2013 senesine iş planına medeniy leyhalar ve faaliyetleri Qırımnıñ inkişafınen bağlı cemaat teşkilâtlarına qoltutmaq, Qırımnıñ tarihiy toponimikasını ğayrıdan tiklevnen bağlı leyhalar, Aqmescitte qaraylar kenasasınıñ işini ğayrıdan başlamaq işlerine maddiy yardım köstermek maqsadını da kirsetti. Tedaviylev, oquv ve diger sotsial leyhalarğa para ayırmaq meselesi ayrıca baqılacaq.

2013 senesiniñ ekinci yarısında Rustem Ümerov Vaquf Prezidentligi vazifesini terk etecegi munasebetinen Vaquf Nizamnamesine deñişmeler kirsetmek qararı alındı. “Bu qarar şimdiki Prezidentniñ Vaquf faaliyetinen bağlı olmağan meselelerge ziyade diqqat ayırmaq zaruriyeti sebebinden alındı”, – denile Vaquf matbuat hızmetiniñ malümatında.