Ukraina Yuqarı Şurasınıñ İnsan, milliy azlıqlar aqları ve milletlerara munasebetler boyunca komiteti Ukraina Prezidentini Qırım ükümeti ve Qırımtatar halqınıñ Meclisi arasındaki davanı yatıştırmağa çağıra

11.03.2013

Mektüp qırımtatarlarnıñ sürgün etilgen künü – mayıs 18 tedbirlerine azırlıq işlerinden “Meclis çetleştirildi”, Meclis vekilleri ise akimiyet organlarındaki vazifelerinden boşatılalar, degen haberlerge seslenüv oldı.

“Qırım icra akimiyeti qırımtatarlarnıñ vekâletli organı olğan Meclisnen kelişmeyip 2013 senesi mayıs 18 matem tedbirlerini keçirüvge tüzetüvler kirsetmege istegeni bizni pek raatsızlay”, – denile Meclis reisi, Ukraina halq deputatı Mustafa Cemilevniñ teşebbüsinen yazılğan muracaatta.

Komitet Yanukoviçke muracaatta bulunıp, ” Ukraina devlet akimiyeti organları, Qırım icra akimiyeti ve Meclis, Qırım Yuqarı Şurasına qırımtatarlar arasından saylanğan deputatlar ve yerli idare organlarınıñ dialogı, işbirligini ğayrıdan tiklev boyunca çare=tedbirlerni körmek” rica ete.

Eger dava çezilmese Ukraina Yuqarı Şurasınıñ komiteti Qırımda seyyar meclisini keçirmege azır olğanını bildirdi. Öz nevbetinde İnsan aqları komitetiniñ azası ve Meclis reisi Mustafa Cemilev dedi ki, “Qırımdaki şimdiki ükümetgniñ qırımtatar milliy areketini parçalamaq niyetleri çul tutmaz”.

Meclis reisiniñ bildirgenine köre Qırımda körüşüv ötkerilip, oña bu vaziyetke alâqadar olğan insanlarnıñ episi davet etilecek. “Biz vaziyetni talil etermiz. Ümüt etemiz ki, bu, kerginlikni yımşatır”, – dep qayd etti Mustafa Cemilev.

“Qırımtatarlar şunı bilmeliler ki, yerli akimiyetniñ kelişmegen areketlerine qarşı yañğız qalmazlar. Meclisni esapqa almamaq ya büyük hata, ya da Qırımdaki vaziyetni kerginleştirmek maqsadınen bile turıp yapılğan fesat”, – dedi eminliknen İnsan, milliy azlıqlarnıñ aqları ve milletlerara munasebetler boyunca komitet reisiniñ birinci muavini Andrey Şevçenko.

Komitet toplaşuvında birağızdan qabul etilgen mektüpte Prezidentke Qırımtatarlarnıñ meseleleri boyunca halqara forumnı Ukrainada keçirmek imkânını da baqmaqnı teklif etti.

Komitetniñ seyyar toplaşuvı Qırımda mayıs 18-ge qadar keçirilmesi kerek.