Türkiye Cumhuriyetiniñ Medeniyet nazirligi İ. Gasprinskiy adına qırımtatar kütüphanesine türk neşirleriniñ bir qısmını ediye etti

01 March 2013

2013 senesi mart 1 künü Qırımnı Türkiye Cumhuriyetiniñ Ukrainadaki Elçiligi medeniyet ve informatsiya meseleleri boyunca hadimi Berat Yıldız ziyaret etti. Onıñ ziyareti Türkiye Cumhuriyetiniñ Medeniyet naziri Ertuğrul Günay ve Meclis reisi Mustafa Cemilev arasında evelden añlaşma yapılıp, Türkiye Medeniyet naziri qırımtatar kütüphanesine türk dünyasına dair çeşit neşirlerni bermek niyetini bildirgeni çerçivesinde oldı.

Berat Yıldıznıñ aytqanıa köre , ediye etilgen kitaplarnıñ birinci qısmına türk tilinde bediiy eserler, bunıñ kibi de Orhan Pamuq ve Cengiz Dağcınıñ rus ve ukrain tiline tercime etilgen bir sıra eserleri kirsetildi. “Yaqın zamanda biz kütüphaneniñ fondını kene zenginleştirmek, cümleden elektron taşıyıcılarda da kitaplarnen temin etmek niyetindemiz”, – dedi Berat Yıldız ve İ. Gasprinskiy adına kütüphanege öz şahsiy fondından da kitaplar bermekni özü içün şeref, dep bilgenini qoştı.

Meclis reisi Mustafa Cemilev Türkiye ükümetine köstergen destegi içün teşekkürler söylep, Türkiye Cumhuriyeti Qırımtatar kütüphanesiniñ fondlarını arttırmaq işinde çoqtan aktiv iştirak etkenini qayd etti.

Meclis reisi Mustafa Cemilev Türkiye Cumhuriyetiniñ Ukrainadaki Elçiligi medeniyet ve informatsiya meseleleri boyunca hadimi Berat Yıldızğa hatırlattı ki, Türkiye Cumhuriyeti Medeniyet naziri Ertuğrul Günay 2012 senesi oktâbr 4-te Qırım ziyareti devamında Qırımtatar kütüphanesi içün içinde oquv salonı, muşavereler salonı ve kileri olğan yañı bina qurmağa vade bergen edi.

Öz nevbetinde B. Yıldız Türkiye Cumhuriyetiniñ Medeniyet Nazirligine kütüphane yolbaşçıları yañı bina qurucılığını finansirlemek içün zarur bütün vesiqalarnı azırlağanlarını haber etecegini işandırdı.

Kitaplarnı taqdim etüv tantanalı merasiminde Qırım Medeniyet naziri A. Plakida, Meclis reisiniñ Türkiye meseleleri boyunca yardımcısı İsmet Yüksel, qırımtatar yazıcı ve şairleri, cemaatçılıq vekilleri iştirak ettiler.

Öz tarafından İ. Gasprinskiy adına qırımtatar kütüphanesiniñ direktorı Gülnara Yağyayeva ve bütün hadimleri Berat Yıldızğa samimiy minnetdarlıqlarını bildirip, bu kitaplar kütüpaheniñ fondında şerefli yer alacaqlarını söyledi.