Meclis reisi Mustafa Cemilev Eskişehir valisi Qadir Köçdemir ile körüşti

25 February 2013

2013 senesi fevral 25 künü Qırımtatar halqı Meclisiniñ reisi Mustafa Cemilev ve onıñ birinci muavini Refat Çubarov Qırımda iş ziyaretinen bulunğan Eskişehir şeeriniñ valisi Qadir Köçdemir reberligindeki delegatsiya ile körüştiler.

Delegatsiya erkânında Eskişehir qırımtatar derneginiñ reisi Mesut Or, “Adalet ve inkişaf” partiyasınıñ deputatı Ülker Can, “Cumhuriyet halq partiyasınıñ” deputatı Kazim Qurt, ” Milliy areket partiyasınıñ” deputatı Ruhsar Demirel, Eskişehirdeki Osmanğazı universitetiniñ sabıq rektorı, türk dünyası medeniyet agentligi direktorları keñeşiniñ azası Fazıl Tekin, bunıñ kibi de Eskişehir qırımtatar dernegi idaresiniñ azası Okan Gökdemir bulunmaqtalar.

“Qırımtatar halqınıñ ayatında Türkiye müim rol oynamaqta. Biz qırımtatar halqınıñ Vatanğa qaytuv ve yerleşüvinde Türkiyeniñ destegine pek yüksek qıymet kesemiz”, – dep qayd etti Mustafa Cemilev subet devamında.

Mustafa Cemilev musafirlerge qırımtatarlarnıñ milliy idare sistemi, “Qurultay delegatlarını saylav nizamı” aqqında aytıp, bu nizamğa köre Qurultay delegatları gizli rey berüv yolunen umumiy, musaviy, doğrudan-doğru seçileceklerini añlattı. Meclis başqanı qırımtatar halqınıñ ayatındaki siyasiy vaqialarnı da tarif etip, soñki vaqıtta cumhuriyet organlarından qırımtatarlarnı çıqarmaqnı tezleştirgenlerini qayd etti.

Qırımtatar halqınıñ aqlarını tiklev boyunca halqara forumnı Ukrainada keçirüv teşebbüsi aqqında aytırkenler, Meclis reberleri qırımtatar halqına nisbeten adaletni faqat halqara cemaatçılıqnıñ küçünen tiklemek mümkünligini söylediler.

Öz nevbetinde Eskişehir valisi Qadir Köçdemir Meclis reisine bu yıl mart ayında Halqara türk dünyası festivali keçirilecegini bildirdi. “Qırımtatar halqınıñ asabalığı bu tedbirde ayrıca yer alacaq. Qardaş qırımtatar arqadaşlarımıznı bu festivalde körmekten memnün olurmız”, – dedi Eskişehir valisi.

Körüşüvniñ soñunda Meclis reisi musafirlerge 1917-1920 senelerde “Millet” gazetasında derc olunğan 300 maqaleden ibaret “Millet cevherleri” kitabını ediye etti. QMPU qırımtatar ve türk filologiyasınıñ ocası, dotsent Tair Kirimov tertip etken cıyıntıq Qırımtatar dernekleri umumiy merkeziniñ maddiy ve Qırım haber agentliginiñ tehnikiy yardımında dünya yüzüni kördi.

Şunı qayd etmeli ki, Eskişehirde 60 biñden ziyade qırımtatarı yaşamaqta.