«Yaşlar Şurası» teşkilâtı Qurultay delegatlarını saylavda iştirak etecek

21.02.2013

“Yaşlar Şurası” gençler teşkilâtınıñ nevbetteki toplaşuvında onıñ Qırımtatar halqı VI çağırılış Qurultayına delegatlarnı saylavda iştirak etmek qararı alındı
“Teşkilât mustaqil yönelişte faaliyet köstererek, er angi birleşme ve bloklarda iştirak etmekten vazgeçti, saylavaldı kampaniyasını keçirüvde maddiy atalıq yapmaq tekliflerini red etti ve gençlerni temsil etken yekâne mustaqil küç olaraq çıqmaqta”, – dep qayd eteler “Yaşlar Şurası”nıñ azaları.

Çoqmandatlı saylav dairesinden kösterilecek namzetler cedveliniñ birinci beş sırasında:

• “Yaşlar Şurası” teşkilâtı Teftiş komissiyasınıñ azası, adliyeci Dilâver Akiyev,
• teşkilâtnıñ idare azası, ekim Asan Çaruhov,
• teşkilâtnıñ idare azası, iqtisadiyatçı Adile Memetova,
• teşkilâtnıñ idare azası, müendis Mustafa Abdurafiyev,
• teşkilâtnıñ azası, Qırım tibbiyat universitetiniñ studenti Elmi Şişmanov    bulunmaqtalar.

“Yañı nesil – yañı ğayeler – semereli areketler” – gençler teşkilâtını temsil etken delegatlar VI çağırılış Qurultayında böyle şiar altında çalışmaq maqsadındalar.

“Yaşlar Şurası” teşkilâtı faaliyetiniñ aşağıdaki esas yönelişlerinden ibaret mahsus programmasını işledi:

1. Millliy idare organlarını yañılamaq;

2.Qırımtatarlarnıñ milliy-medeniy degerliklerini kütleviyleştirmek;

3.Qırımtatarlar akimiyetniñ bütün organlarında temsil etilmesine irişmek;

4. Qırımtatarlarnıñ aqlarını qorçalamaq;

5. Halqnı vatanperverlik ğayesi etrafında birleştirmek.

Programma tafsilâtlı şekilde mahsus matbuat konferentsiyasında taqdim etilecek. Teşkilâtnıñ resursı – teşkilât azalarınıñ kendileri – halqınıñ taqdirine bifarq olmağan faal, namuslı, vatanperver gençlerdir.

Cedvelge kirsetilgen namzetler arasında adliyeciler, ekimler, iqtisadiyatçılar, müendisler, talebe ve ocalar, aşçı ve qurucılar bar. Olarnıñ episini Vatan sevgisi, halqınıñ menfaatı oğrunda areket etmek istegi birleştirmekte.

Belli ki, yaqın vaqıtta VI çağırılış Qurultayına delegatlar saylanacaq. Saylavlar “Qırımtatar halqı Qurultayınıñ delegatlarını saylav aqqında” 2013 senesi yanvar 12-de qabul etilgen Nizamğa muvafıq yañı saylav sisteması boyunca keçirilecek.

Tasdiqlanılğan taqvimiy planlarğa köre saylavlar Bağçasaray, Qurman ve Aqmesçit regionlarında – 25 fevral künü, Aqyar, Canköy, Qarasuvbazar ve İçki regionlarında 26 fevralde olacaq.