Refat Çubarov: Qırım – Romanovlar sülâlesiniñ degil de, epimizniñ evimizdir

20 February 2013

Qırım Yuqarı Şurasınıñ fevral 20-de olıp keçken sessiyasında Meclis reisiniñ birinci muavini, “Qurultay-Ruh” fraktsiyasınıñ başı Refat Çubarov Cumhuriyet İnformatsiya komiteti tarafından neşir etilgen “Krım -2013” taqvimini keskin tenqid etti.

Refat Çubarov Taqvimde iç bir qırımtatar medeniy yadikârlıqnıñ resimi, iç bir qırımtatar şairinden satırlarnıñ olmağanınen iç razı degil. Bunı Refat Çubarov sessiyada deputat Sergey Tsekovnıñ teklifine köre Romanovlar evi bayramını keçirüv meselesi muzakere etilgende bildirdi.

“1613 senesi Qırımda Geraylar sülâlesi ükümdarlıq etip, mında Qırım Hanlığı bar edi. Nasıl Romanovlar evi şu? Moskvada 1613 senesi Mihail Romanov tahtqa köterildi, lâkin Qırımda degil – Moskvada! Qırımnıñ bu vaqianen ve Romanovlar sülâlesiniñ ükümranlığı başlağanınen ne alıp berecegi bar?” – dedi Refat Çubarov Sergey Tsekov teklif etken leyha aqqında.

Sergey Tsekov ise taqvimde qırımtatarlarğa dair malümat olmağanında qırımtatarlarnıñ özleri qabaatlılar, dedi. Refat Çubarov böyle cevap berdi: “Eger Nazirler Şurasında qırımtatarlarnıñ medeniyeti ve tasilinen oğraşqan hadimler olsa edi, bu suallerge acet qalmaz edi”.

Şunı hatırlatamız ki, fevral 14 künü Qırım Yuqarı Şurası Bücet, iqtisadiyat ve yatırımlar siyaseti boyunca daimiy komissiyanıñ toplaşuvında deputat Tsekov teklif etken “Çar Romanovlar eviniñ Qırımda 400 yıllığı munasebetinen bayram teldbirleri” leyhası muzakere etilgende Meclis reisiniñ birinci muavini, “Qurultay-Ruh” fraktsiyasınıñ başı Refat Çubarov Romanovlar Eviniñ Qırımda 400 yıllığını qayd etilmesine aqılsız ve iç kimsege keregi olmağan bir siyasiy adım, dep qıymet kesti.

R. Çubarov Mihail Romanov 1613 senesi tahtqa çıqqanda Qırımnıñ Moskvağa iç bir türlü alâqası olmağanında emin.