Qırımtatar halqı Meclisiniñ reisi Mustafa Cemilev Gennadiy Udovenkonıñ vefatı munasebetinen taziye bildirdi

14 February 2013

Qırımtatar halqı Meclisiniñ reisi Mustafa Cemilev Meclis ve şahsen kendisiniñ adından Ukraina vatanperveriniñ ailesi, yaqınları ve aqrabalarına Gennadiy Udovenko vefatı munasebetinen taziye bildirdi.

2013 senesi fevral 12 künü belli ukrain siyaset erbabı, dilomat, Ukraina Tışqı işler naziri(1994—1998), Birleşken Milletler Teşkilâtı Baş Assambleyası 52-nci sessiyasınıñ prezidenti (1997-1998) Ukraina Halq areketiniñ başı (1999 – 2003), Ukraina halq deputatı (3 ve 5-nci çağırılış) 82 yaşında Gennadiy Udovenko vefat etti

Gennadiy Udovenko Ukraina Sovet Sotsialistik cumhuriyeti devrinde şekillengen, amma bütün küçü, bilgi ve ğayretini mustaqil Ukraina devletiniñ tiklenmesine bağışlağan, Ukrainada demokratiya printsipleri, insan ve halqlarnıñ aqları teminlenmesi içün küreşken nesilniñ eñ parlaq vekillerinden biri edi.

Ukraina halq deputatı ve Ukraina Yuqarı Şurasında İnsan aqları, milliy azlıqlar ve milletlerara munasebetlerniñ işleri boyunca daimiy komitetniñ reisi olğan Gennadiy Udovenko qırımtatar halqı aqlarınıñ tiklenilmesini talap etip, halqnıñ öz Vatanına qaytmasına samimiy sevingen edi.

Gennadiy Udovenko Ukraina milliy-demokratik küçler birleşmesiniñ ve qırımtatar milliy areketinen sıqı işbirlikte bulunmaqnıñ tarafdarı olaraq, ukrain ve qırımtatar halqına nisbeten cinayet yapqan kommunist rejiminiñ aqibetlerini beraberlikte yoq etmek mümkün, dep saya edi. Gennadiy Udovenko daima qayd ete edi ki, Ukrainanıñ demokratik inkişafını ve Avropa dzjemiyetine qatılmasını teminleycek esas şart bu – Qırımnıñ tamır halqı olğan qırımtatarlarnıñ aqlarını tiklevdir.

Gennadiy Udovenkoniñ adı qırımtatarlar ve Ukraina vatandaşlarınıñ hatırasında ebediy saqlanıp qalır.