Aluştada musulman mevtalarnıñ naaşları tapıldı

30 January 2013

Aluştada avtovokzalnıñ yanında qurucılıq işleri alınıp barılğan binada musulman adetleri boyunca defn etilgen mevtalarnıñ kemikleri tapıldı. Aluşta regional meclis reisi Enver Arpatlınıñ bildirgenine köre “mevtalar 1,8 metr terenlikte, biri-birilerinden birer metrde kömülgen.

“Naşlar tapılğanınen maña haber ettiler ve men bir kereden o yerge bardım. Avtovokzalğa kelgen soñ men Ukraina Telükesizlik Hızmeti, şeer şurası ve mesken-qullanuv komitetine çañ qaqtım. Kemikler çıqarılıp, ekpertizağa yollanıldı”, – dedi regional meclis reisi

Bunıñ kibi de o, mevtalar musulman urf-adetleri boyunca kömülgenini qayd eterek, bu al şimdiki avtovokzalnıñ yerinde musulman qabristanı olğanını isbat ete, dedi.

“Militsiya ve Telükesizlik hızhmetiniñ vekilleri söz bergenlerine köre, iş yaqın vaqıtta tafsilâtlı şekilde ögrenilip, taqiqat başlanacaq”, – dep qayd etti Enver Arpatlı.