Aqmescitte «Adalet» milliy partiyasınıñ VI qurultayı ötkerildi

28 January 2013

Yanvar 26 künü Aqmescitte “Adalet” milliy partiyanıñ VI qurultayı ötkerildi.

Qurultay işiniñ neticesinde Qırımtatar halqı VI çağırılış qurultayınıñ delegatlığına yekâne çoqmandatlı saylav dairesinden “Adalet” partiyasından namzetler cedveli qabul etildi.

Bundan da ğayrı “Adalet” partiyası qurultayınıñ delegatları partiyanıñ saylavaldı programmasını maqullep, qabul ettiler. “Adalet” partiyasınıñ azaları V çağırılış Qırımtatar halq qurultayınıñ delegatı, Qırım Yuqarı şurasında “Qurultay-Ruh” fraktsiyasınıñ deputatı Enver Abduraimovnıñ sözleri hususında beyanatnen çıqışta bulundılar.

“Adalet” milliy partiyasınıñ VI qurultayı Enver Abduraimovnıñ sözlerini keskin qaralay ve şunı qayd ete ki, soñki vaqıtta çeşit türlü fesatçılarnıñ ve provokatsion teşkilâtlarnıñ areketleri faalleşkeni kederli bir aldır, – denile muracaatta. – “Adalet” milliy partiyası totalitar rejim cinayetlerini tedqiq etmege, oquv qullanmalarını mükemmelleştirmege, insannıñ degerligi, aqları ve serbestligi aqqında yaş nesilge ders bermege çağıra”.

“Adalet” milliy partiyasınıñ VI qurultayı Enver Abduraimovnıñ areketi Qırımtatar halqı Qurultayı delegatı degen yüksek unvanğa, milletniñ vekâletli organınıñ maqsad ve vazifelerine, Qırım Yuqarı Şurasınıñ deputatlığına namzetini maqullegen qırımtatar halqı bildirgen işançqa aslı da uymay, degen fikirni bildirdi.

Qurultaynıñ soñunda “Adalet” partiyasınıñ reisi Fevzi Qubedinovğa Qırımtatar halqı VI çağırılış qurultayınıñ delegatlığına yekâne çoqmandatlı saylav dairesinden “Adalet” partiyasından namzetler cedvelini tizip, cedvel leyhasını belgilengen tertipte Qırımtatar halqı Qurultayınıñ Merkeziy saylav komissiyasına bermek avale etildi.

“Adalet” partiyasından namzetler cedveliniñ birinci sıralarına

• Qırımtatar halqı Meclisi reisiniñ muavini, Qırım Yuqarı Şurası Daimiy komissiyasınıñ reisi Remzi İlyasov;
• “Adalet” partiyasınıñ reisi Fevzi Qubedinov;
• “Küreş” Qırım milliy küreş federatsiyasınıñ fahriy reisi, Olimpiya çempionı Rustem Kazakov;
• V çağırılış Qırımtatar halqı Qurultayınıñ delegatı Enver Nafiyev;
• “QHA” informatsion agentliginiñ müdiri, filologiya ilimleri namzeti, QMPU Qırımtatar ve türk edebiyatı kafedrasınıñ dotsenti Gayana Yüksel kirdi.