Qırımtatar halqı qurultayınıñ delegatı, Qırım Yuqarı Şurasınıñ deputatı Enver Abduraimovnıñ sözleri munasebetinen «ADALET» qırımtatar milliy partiyası VI qurultayınıñ beyanatı 2013 senesi yanvar 26-da qabul etildi

28 January 2013

Qırımtatar halqı qurultayınıñ delegatı, Qırım Yuqarı Şurasınıñ deputatı Enver Abduraimovnıñ sözleri munasebetinen

“ADALET” qırımtatar milliy partiyası VI qurultayınıñ

BEYANATI

2013 senesi yanvar 2 künü Qırımtatar halqı qurultayınıñ delegatı, Qırım Yuqarı Şurasınıñ deputatı Enver Abduraimov ATR telekanalınıñ “Mız-Mızlar” yayınında 1944 senesiniñ sürgünliginde yarı-yarığa qırımtatar qabaatlıdır, dedi ve bunıñnen totalitar rejim tarafından öz halqına nisbeten yapılğan cinayetni aqladı. Holokost faciası içün 50 fayız suçnı ise yeudiylerge yükledi. Bundan da ğayrı, o şahsiy eglenceleri ve kündelik ömüriniñ bazı detallerini tarif etip, bazı vaqialarğa qıymet keskeni onıñ ahlâqını açıqtan-açıq kösterdi.

“ADALET” qırımtatar milliy partiyası VI qurultayı soyqırım, qırımtatar halqınıñ birinci eki yılı içinde 46 fayızı açlıq, hastalıqtan elâk olğan sürgünligini aqlavnen bağlı er angi areketlerni cinaiy ve yapılabilmez bir areket, dep saya.

27 yanvar künü dünya cemaatçılığı Holokost qurbanlarınıñ hatırasını añmaq halqara künü munasebetinen matem tedbirlerini keçire. Holokost keniş manada – bu, yeudiy, çingene, qırımçaqlar, hasta ve zayıflarnı natsistler tarafından taqip ve telef etüvdir. Holokost aqibetinde Avropanıñ 60 fayız yeudiylerini yani dünya ealisiniñ üçte birini, çingenelerniñ üçte birini, poloniyalılarnıñ 10 fayızı, zenciler yoq etildi, ruhiy ve ağır hastalar tibbiy eksperimentler içün qullanıldı.

“ADALET” qırımtatar milliy partiyası VI qurultayı Enver Abduraimovnıñ sözlerini keskin qaralarken, soñki vaqıtta fesatçı teşkilât ve ayrı şahıslarnıñ areketleri ep faalleşkeni munasebetinen kederlengenini bildire. “ADALET” qırımtatar milliy partiyası totalitar rejimlerniñ cinayetlerini araştırmaq, oquv qullanmalarnı mükemmelleştirmek ve işlemek , yaş nesilge insan aqları, demokratiya ve barışıq aqqında añlatmaq zarur, dep tanıy.

“Adalet” milliy partiyasınıñ VI qurultayı Enver Abduraimovnıñ areketi Qırımtatar halqı Qurultayı delegatı degen yüksek unvanğa, milletniñ vekâletli organınıñ maqsad ve vazifelerine, Qırım Yuqarı Şurasınıñ deputatlığına namzetini maqullegen qırımtatar halqı bildirgen işançqa aslı da uymay, degen fikirni bildirdi.

2013 senesi yanvar 26 künü qabul etildi
Aqmescit ş,