Mustafa Cemilev: «2013 senesi aprel-mayıs aylarına planlaştırılğan OSCE mustaqil ekspertleriniñ Qırımdaki vaziyet ve qırımtatar halqınıñ alı boyunca esabatı aqiqatnı kösterir ve olacaq Halqara forum iştirakçilerine konkret tevsiyelerni işlemelerine s

24 January 2013

2013 senesi yanvar 24 künü Qırımtatar halqı Meclisiniñ reisi, Ukraina halq deputatı Mustafa Cemilev OSCE Aliy komissarınıñ milliy azlıqlarnıñ işleri boyunca yardımcısı Aleksandr Vinnikov ve adliye meseleleri boyunca mesleatçısı Vinsent de Graf ile körüşti.

Meclis reisiniñ birinci muavini Refat Çubarov, Meclis tışqı işler bölüginiñ başı Ali Hamzin, Meclis Kâtibiyetiniñ reberi Zair Smedlâyev iştirak etken bu körüşüvde mustaqil ekspertler Halqara forum iştirakçileriniñ muzakeresine taqdim etecek meselelernen bağlı tedqiqatlarnı azırlav ketişatı baqıldı.

“OSCE Aliy komissarınıñ milliy azlıqlarnıñ işleri boyunca ofisniñ Endrü Vilson yolbaşçılığında çalışqan mustaqil ve yüksek ihtisaslı ekspertlerniñ çalışmaları neticesinde olacaq Forum iştirakçileri içün konkret tevsiyeler azırlandı”, – dep esap berdiler OSCE Aliy komissarınıñ yardımcıları Aleksandr Vinnikov i Vinsent de Graf bildirgenlerine köre umumleştirilgen maruza ve tevsiyeler Ukrainada akkreditatsiya etilgen elçiler korpusı tarafından aprel ayında baqılıp, soñra mayıs-iyün aylarında Kiyevde resmiy şekilde taqdim etilgen soñ ingliz, rus ve ukrain tillerinde derc olunacaq em d OSCE saytında yerleştirilecek. Körüşüv devamında onıñ iştirakçileri Qırımdaki siyasiy-içtimaiy vaziyetke dair fikirlerinen paylaştılar.

OSCE Aliy komissarınıñ yardımcıları 2012 senesi dekabr 1 gecesi Cuma cami qaravulına tecavuz ve Molodöjnoye qasabasında “Russkoye yedinstvo” tarafından yapılğan tertipsizlik, Stalinge bağışlanğan sergi boyunca taqiqat neticelerinen meraqlandılar.

Körüşüvniñ soñunda Meclis reisi Mustafa Cemilev OSCE Aliy komissarınıñ yardımcılarını Halqara Forumğa böyle ciddiy ve sistem azırlıq körgenleri içün teşekkür bildirip, şunı da qayd etti ki 2013 senesi aprel-mayıs aylarına planlaştırılğan OSCE mustaqil ekspertleriniñ Qırımdaki vaziyet ve qırımtatar halqınıñ alı boyunca esabatı aqiqatnı kösterir ve olacaq Halqara forum iştirakçilerine konkret tevsiyelerni işlemelerine siltem olur”