Remzi İlyasov: «5-nci çağırılış Qurultay yañı seviyege köterilmek imkânını bergen qararlarnı aldı»

17 January 2013

Yanvar 17 künü Meclis reisiniñ muavini, Qırım Yuqarı Şurasında “Qurultay-Ruh” fraktsiyasınıñ deputatı Remzi İlyasov kütleviy matbuat vastalarınıñ vekillerinen körüşti.

Körüşüv devamında R. İlyasov keçken Qurultaynıñ neticeleri, “Qırımtatar halqı qurultayınıñ delegatlarını saylav nizamı”nı tarif etip, jurnalistlerniñ suallerine cevap berdi.

“Matbuat konferentsiyasında men yalıñız şahsiy fikirlerimni degil de, beş yıl devamında tekliflerimizni beraber kirsetken meslekdeşlerimniñ de pozitsiyasını seslendirmek isterdim, – dedi Remzi İlyasov. – Şunı qayd etmek kerek, 5-nci çağırılış Qurultay milliy idare sistemimizni yañı seviyege kötergen qararlarnı aldı”.

“Qurultaynıñ 2012 senesi iyül 21-22 künleri olıp keçken 4-nci sessiyasında 35 insandan ibaret saylav komissiyası tizilgen ve qabul etilgen qarar çerçivesinde “Qurultay delegatlarını saylav nizamı”nıñ leyhasını azırlamaq avale etilgen edi. Bese-belli nizamnı azırlav vaqtında komissiya azaları biri-birilerinen yahşı añlaşıp olamağanlarından iş yürüşmedi. Men Merkeziy saylav komissiyasına Qurultay qabul etken nizamğa boysunıp, ğayrıdan baqılması kerek olğan maddelerni ise Meclisniñ muzakeresine ayrıca bermekni teklif etken edim. Teessüf ki, konstruktiv laqırdı olmadı ve neticede “Nizamnı” azırlav müddeti belgilenmedi. Şunıñ içün de nevbetteki sessiyanı keçirmek zaruriyeti doğdı.

Remzi İlyasovnıñ bildirginene köre onıñ kendisi leyhağa 30-ğa yaqın tüzetüv kirsetken. “Men delegatlardan saylav blokları ve namzetlerniñ bir kereden em partiya cedvellerinde, em majoritar dairelerde iştirak etüvlerine dair kesen-kes hulâsağa kelmekni rica ettim. Zanımca, Qurultay demokratik bir qarar aldı, komissiya azalarınıñ saylavda iştirak etmege aqqı yoq”.

“Nizam boyunca tüşken bazı tekliflerni keçirmek mürekkep olacağını añlağanım alda böyle teklifler qızğın muzakere etilgeninden memnünim, – dedi İlyasov.

Qurultay delegatlarını saylav Nizamı hususında İlyasov böyle dedi: “Nizamnı umumen alğanda begenem. Alınğan qararlar ne qadar qapa-qarşı olmasın, neticede milliy idare sistemimizniñ seviyesini kötermek imkânını bereceklerine eminim”.

Bu yılı ötkerilmesi planlaştırılğan saylav meselesine dair İlyasov şularnı ayttı: “Qurultay delegatlarını saylavnıñ ketişatını közetmek içün çetelli nezaretçiler kelecek”. Merkeziy saylav komissiyası yerlerde de azırlıq işlerini soñuna yetkizgen soñ rey berilüvge 30 kün qalğanda Meclis saytında ve milliy neşirlerde ilân berilecek, dep qayd etti R. İlyasov.

Jurnalistlerniñ Meclis reisligi aqqındaki suallerine Remzi İlyasov söyledi ki, Mustafa Cemilev qırımtatar halqınıñ lideri olıp qalmaq kerek, dedi. Bunıñ kibi de R. İlyasov yañı qurum –er angi seviyedeki qırımtatar deputatlarını birleştirgen Vekiller palatası meydanğa ketirilecegini ayttı.